Home » Desvelo di busto di John F. Kennedy: Simbolo di compromiso cu liderazgo y servicio na comunidad

Desvelo di busto di John F. Kennedy: Simbolo di compromiso cu liderazgo y servicio na comunidad

by Admin
0 comments 21 views

 

 

Diabierna 20 di november, Prome Minister Mike Eman a participa na e ceremonia di desvelo di busto di presidente John F. Kennedy na JFK Education Center. E acto simbolico ta representa un homenahe na e expresidente Mericano, su legado di liderazgo y su compromiso cu libertad, igualdad y bienestar di comunidadnan.

E ceremonia a conta cu palabra di bonbini di Minister Rene Herdé, sigui pa un intervencion di Sra. Jeanette Heronimo-Lopez Henriques y e discurso di Prome Minister Mike Eman.

Prome Minister a reflexiona riba e impacto internacional di presidente Kennedy, destacando cu su liderazgo a inspira generacionnan rond mundo. Segun Eman, Kennedy a representa un vision di cambio, dunando bos na comunidadnan cu no tabatin suficiente representacion y defendiendo e interesnan di esnan mas vulnerabel.

Un filosofia di servicio na pais

Un di e frasenan mas conoci di presidente Kennedy, cu Prome Minister Mike Eman regularmente ta menciona den su discursonan, ta:

“No puntra kico bo pais por haci pa bo, sino kico abo por haci pa bo pais.”

E filosofia aki ta pone enfasis riba responsabilidad individual y colectivo, caminda cada ciudadano tin un papel den construccion di un miho sociedad. Ta un invitacion pa no mira bienestar di pais solamente como responsabilidad di Gobierno, sino como un compromiso comparti entre tur ciudadano.

E pensamento aki ta conecta cu e legado di servicio publico cu Kennedy a representa y cu e homenahe na JFK Education Center ta busca mantene bibo pa generacionnan venidero.

Un compromiso cu JFK Education Center

Prome Minister a recorda tambe su compromiso anterior cu JFK Education Center. Durante un bishita prome cu su entrada den Gobierno na 2009, el a observa e condicion di e edificio y a compromete su mes pa restaura e scol y debolbe e nomber di presidente John F. Kennedy na e institucion. Un compromiso cu posteriormente a wordo realisa.

Eman a destaca cu e desvelo di e busto ta un paso adicional den e reconocemento na e legado di Kennedy, y cu e centro educativo cu ta carga su nomber ta e luga adecua pa preserva e homenahe aki.

Durante e ceremonia a comparti tambe e historia personal tras di e busto, cu durante hopi aña a forma parti di un coleccion familiar y cu posteriormente a wordo ofreci como donacion na e institucion. E trabou di restauracion a haci posibel pa e obra haya un luga di honor den e centro educativo.

Prome Minister a haci referencia tambe na su relacion cu diferente miembro di famia Kennedy, incluyendo Joe Kennedy, kende anteriormente a participa na un conferencia organisa na Aruba. El a expresa su aprecio pa e legado di servicio publico cu diferente generacion di e famia aki a continua.

E ceremonia a culmina cu e desvelo oficial di e busto y un reconocemento na esnan cu a contribui na su restauracion, incluyendo e cooperacion di UNOCA.

Cu e homenahe aki, JFK Education Center ta fortalece su conexion cu e historia y e balornan di liderazgo, servicio y compromiso social cu John F. Kennedy a representa.

 

You may also like