Home » Minister Dowers a reuni cu Projectteam Aruba Forensische Zorg, TBS y PIJ

Minister Dowers a reuni cu Projectteam Aruba Forensische Zorg, TBS y PIJ

by Admin
0 comments 18 views

 

Recientemente Minister di Husticia, Integracion, Transporte Publico y Energia, mr. drs. Arthur Dowers, a reuni cu e ekipo encarga cu e desaroyo di cuido forensico na Aruba, den cuadro di e iniciativa pa fortalece e cuido y guia di personanan cu problema psicologico, psikiatrico of di adiccion cu ta den contacto cu sistema di husticia.

E encuentro ta forma parti di e preparacion pa formacion oficial di Projectteam Aruba Forensische Zorg, TBS y PIJ, cu lo drenta na vigor dia 1 di december 2026.

E proyecto ta enfoca riba desaroyo di un sistema di cuido forensico mas structura y specialisa, cu ta combina e aspecto di husticia cu cuido di salud mental. E meta ta pa brinda tratamento y acompañamento adecua na personanan cu ta den conflicto cu ley, contribuyendo na reduccion di recidivismo y proteccion di comunidad.

E ekipo ta conta cu representacion di diferente instancia, incluyendo Ministerio di Husticia, Ministerio di Salud Publico, Ministerio Publico, Bureau Orthopedagogisch Centrum Aruba, Dienst Gevangeniswezen Aruba, Stichting Reclassering en Jeugdbescherming Aruba, FMSA Respaldo y Stichting HUNTO.

Durante e encuentro a trata e importancia di un cooperacion structural entre e diferente instancianan, pa logra un enfoke integral den cual husticia, salud mental y guia social ta traha hunto.

Un di e responsabilidadnan principal di e Projectteam ta pa identifica e necesidadnan actual na Aruba, establece prioridadnan y prepara proyectonan concreto pa fortalece e cuido forensico. Esaki ta inclui posibilidadnan di tratamento den detencion, cuido ambulante y otro facilidadnan specialisa, incluyendo atencion pa hobennan cu ta den contacto cu husticia.

E iniciativa ta forma parti di e Meerjarig Programma Forensische Zorg en Behandeling, TBS en PIJ, establece den cuadro di cooperacion entre e paisnan den Reino Hulandes durante e Justitieel Vierlanden Overleg. 

E Projectteam lo tin cu presenta un prome analisis, prioridadnan y un plan di accion den un periodo di cuater luna despues di su formacion. Ademas, e ekipo lo reporta regularmente e progreso, resultado y retonan den ehecucion di nan trabao.

Cu e formacion di e Projectteam aki, Aruba ta duna un paso importante den fortalecemento di cuido forensico y den desaroyo di solucionnan structural pa personanan cu tin necesidad di tratamento specialisa den cuadro di husticia.

 

You may also like