Home » Minister Dowers ta huramenta cinco funcionario como BOA

Minister Dowers ta huramenta cinco funcionario como BOA

by Admin
0 comments 3 views

 

Diahuebs, 19 november 2026, Minister di Husticia, Integracion, Transporte Publico y Energia, mr. drs. Arthur Dowers, a huramenta cinco funcionario como Buitengewoon Opsporingsambtenaar (BOA).

E grupo ta consisti di un funcionario di Landsrecherche y cuatro funcionario di Departamento di Impuesto.

Cu e huramentacion aki, e cinco funcionarionan ta ricibi e autoridad necesario pa ehece tareanan specifico di investigacion y aplicacion di ley, den e limite di nan competencia y responsabilidad.

Durante e ceremonia, Minister Dowers a enfatisa e importancia di profesionalismo, integridad y responsabilidad den ehecucion di tareanan di investigacion. E minister a remarca cu e autoridad cu un BOA ta ricibi ta bin cu un responsabilidad grandi, ya cu cada accion mester ta basa riba ley, imparcialidad y respet pa derecho di ciudadano.

E huramentacion ta representa un paso importante den fortalecemento di capacidad di investigacion y supervision den servicio publico. Tanto Landsrecherche como Departamento di Impuesto ta cumpli un rol importante den garantisa cumplimento di ley y proteccion di interes publico.

Minister Dowers a felicita e cinco funcionarionan cu nan huramentacion y a desea nan hopi exito den ehecucion di nan responsabilidadnan nobo.

Cu e huramentacion aki, Gobierno di Aruba ta sigui inverti den fortalecemento di institucionnan publico, promoviendo integridad, profesionalismo y un ehecucion efectivo di ley.

You may also like