Secretario di Estado di Hulanda pa Relacionnan den Reino, Eric van der Burg, a expresa su satisfaccion cu e resultadonan di Kingdom Summit, cu a tuma luga dia 17 y 18 di november na Sint Maarten. Segun Van der Burg, e cuatro paisnan di Reino a logra acuerdo importante pa fortalece cooperacion, cu e obhetivo principal di mehora calidad di bida di nan ciudadanonan. Van der Burg a destaca cu e delegacionnan di Aruba, Corsou, Sint Maarten y Hulanda a dialoga intensivamente y den un ambiente habri durante e dos dianan. E paisnan a identifica diferente prioridad, incluyendo siguridad, fortalecemento di capacidad pa enfrenta retonan, retencion di talento y cooperacion economico.
Economia ta crece, pero pueblo tambe mester beneficia
Un di e puntonan mas importante di e entrevista tabata e reconocemento di Van der Burg cu crecemento economico, particularmente den turismo, no ta significa automaticamente cu e poblacion ta experimenta un miho calidad di bida. “Nos ta mira cu, specialmente danki na turismo, economia ta bay bon. Pero e hendenan tambe mester bay bon”, Van der Burg a declara. Ta netamente esaki ta den liña cu e mensahe cu Prome Minister Mike Eman a presenta durante Kingdom Summit, caminda el a destaca e necesidad pa transforma prosperidad economico den bienestar real pa pueblo. Van der Burg a reconoce cu pobresa ainda ta un reto importante den e tres paisnan Caribense, pero tambe den Bonaire, Saba y Sint Eustatius. Segun e Secretario di Estado, combati pobresa ta rekeri un esfuerso comparti, mientras cu e paisnan mester traha pa fortalece y diversifica nan economia.
El a destaca cu e dependencia grandi di turismo ta representa un riesgo economico. E ta importante pa desaroya otro actividad economico y investiga con un parti mas grandi di e ingresonan genera riba e islanan por keda den nan propio economia. E punto aki ta conecta cu e iniciativa cu Prome Minister Eman a destaca despues di Kingdom Summit, pa reduci e salida di ingreso genera door di turismo y percura pa mas di e beneficio economico keda riba nos mesun suela.
Cooperacion riba siguridad y retencion di talento
Van der Burg a destaca tambe cu siguridad ta un reto comparti cu ta afecta tur e islanan. Segun dje, cooperacion entre e paisnan por contribui na un miho preparacion y capacidad pa enfrenta criminalidad y otro menasanan. Un otro prioridad ta retencion di talento, particularmente di hobennan cu ta sali di e islanan pa studia na Hulanda y cu posteriormente no ta regresa.
E Secretario di Estado a indica cu e temanan aki a haya atencion den e declaracion final di Kingdom Summit y cu e paisnan a acorda pa sigui traha hunto riba nan.
Van der Burg ta expresa aprecio pa contribucion di Mike Eman
Van der Burg a dedica palabranan di aprecio na Prome Minister Mike Eman y su contribucion na e dialogo den Reino. Segun e Secretario di Estado, Eman semper ta participa den e deliberacionnan di un manera serio, reflexivo y constructivo, cu e intencion pa contribui positivamente na fortalecemento di Reino. Van der Burg a expresa cu lo e extraña e colaboracion cu Eman, pero a agrega cu ainda lo tin un momento di despedida.
“E despedida ta un saludo nobo”, Van der Burg a expresa!
Van der Burg ta reafirma e importancia cu Gobierno di Hulanda ta duna na e temanan di bienestar social, diversificacion economico y cooperacion regional, cu tambe tabata central den e presentacion di Prome Minister Eman. E Kingdom Summit a conclui cu un werkagenda comparti entre e cuatro paisnan, cu mester sirbi como base pa traduci e dialogo den resultado concreto pa e habitantenan di Reino Hulandes.