Prome Minister di Corsou, Gilmar “Pik” Pisas, a expresa su satisfaccion cu e resultadonan di Kingdom Summit, cu a conclui diaranson ultimo na Sint Maarten. Pisas a destaca e acuerdonan cera entre e cuatro paisnan di Reino Hulandes, specialmente e oportunidadnan pa cooperacion den maneho di desperdicio, reduci costo di bida y trece mehoracion den ingreso di e clase trahado. “Nos como pais Corsou ta sumamente contento cu e resultado di Kingdom Summit!”, Pisas a remarca.
E Prome Minister di Corsou tabata buscando pa hopi tempo un oportunidad pa e cuatro paisnan reuni na e nivel aki, cu e obhetivo di por yega na acuerdo concreto tocante e retonan cu tin den comun. Pisas a destaca cu, a pesar cu cada pais tin su propio circunstancia, hopi di e problemanan cu nan ta enfrenta ta similar. Cooperacion den Reino por contribui na solucion mas efectivo.
Aruba y Corsou ta busca solucionnan hunto pa maneho di desperdicio
Un di e temanan cu Pisas a destaca ta cooperacion regional den maneho di desperdicio, un problema cu tanto Corsou como Aruba ta enfrenta. Segun Pisas, e cantidad di desperdicio na Corsou ta aumentando dia pa dia, entre otro como consecuencia di e crecemento di sector turistico. E situacion aki ta crea un necesidad urgente pa busca solucion sostenibel pa futuro. E Prome Minister a splica cu durante Kingdom Summit a yega na acuerdo pa investiga e posibilidadnan di cooperacion entre e islanan, cu e obhetivo di identifica solucion concreto pa procesamento y maneho di desperdicio. E tema aki ta den liña cu e iniciativa cu Gobierno di Aruba, bou di liderazgo di Prome Minister Mike Eman, a presenta pa explora cooperacion regional cu Corsou y Boneiro den e area di maneho di desperdicio. E inclusion di e tema den e werkagenda di Kingdom Summit ta brinda un base pa e paisnan continua e trabou y investiga con nan por desaroya solucion hunto.
Salario minimo mas cerca di e bestaansminimum
Prome Minister Pisas a dedica atencion tambe na e costo halto di bida, cu ta un di e retonan principal pa pueblo di Corsou. El a splica cu e aumentonan di prijsnan internacional, particularmente di combustibel y comestibel, ta pone presion riba e poder di compra di e famianan. Gobierno di Corsou ta trahando riba diferente medida pa brinda alivio na e poblacion, incluyendo pa trece un mehoracion den ingreso di e clase trahado y alivio pa esnan mas vulnerabel den comunidad. Un di e metanan cu Pisas a destaca ta pa logra cu salario minimo na Corsou yega na e nivel di bestaansminimum pa 2029, di manera cu e empleadonan por tin un ingreso mas adecuado pa cubri nan gastonan basico.
E Prome Minister a splica cu Gobierno di Corsou ta preparando pa bay den dialogo cu comercio riba e tema primordial aki. Asina por mira cu pais Corsou tambe ta hiba un lucha cu Prome Minister Mike Eman ta promoviendo na Aruba pa mira e salario minimo mas cerca di e bestaansminimum y logra un reparticion mas husto di e prosperidad economico. Durante e Kingdom Summit, Eman a destaca cu e crecemento economico di Aruba, particularmente den turismo, mester traduci den un miho calidad di bida pa pueblo.
Aprecio pa experiencia y liderazgo di Mike Eman
Prome Minister Pisas a reflexiona tambe riba su relacion cu Prome Minister Mike Eman y e importancia di experiencia den politica. E Prome Minister di Corsou a expresa cu e experiencia cu Eman a acumula durante su trayectoria politico a destaca e importancia pa e conocemento aki por sigui contribui na futuro. Pisas a indica cu e ta dispuesto pa mantene e cooperacion cu Eman, tambe despues di su periodo como Prome Minister di Aruba. E amistad entre e dos lider y e importancia cu nan ta duna na cooperacion entre Aruba y Corsou ta keda!
Un agenda comparti pa futuro di Reino
Corsou ta hopi satisfecho cu e resultado di e dos dianan di deliberacion, specialmente cu e hecho cu e paisnan a logra establece un direccion comparti pa nan cooperacion den futuro. Prome Ministernan Pisas y Eman ta mustra cu Aruba y Corsou tin varios interes comun den diferente area, particularmente maneho di desperdicio, combati costo di bida y aumento di salario minimo. Cu e conclusionnan di Kingdom Summit, e cuatro paisnan a establece un werkagenda cu mester sirbi como base pa continua e dialogo y desaroya proposicion concreto pa mehora bienestar di nos tur.