Gobierno di Aruba ta anuncia cambio oficial di nomber di caya pa e parti di L.G. Smith Boulevard situa entre rotonde Plaza di Cultura (Cas di Cultura) y rotonde Sun Plaza, cu entrante 1 di december 2026 ta wordo conoci como J.H.A. (Henny) Eman Boulevard.
Cu e cambio di nomber aki, Aruba ta honra sr. Jan Hendrik Albert (Henny) Eman, pa su contribucion grandi na nos pais y pa ocupa e posicion di prome minister-president di Aruba.
E cambio aki ta trata solamente e nomber oficial di e caya. E numbernan di cas y cualkier adicion na e adresnan concerni lo keda sin cambio.
Residente, comercio, oficina y institucion cu ta situa na e adresnan concerni no tin cu informa CENSO di e cambio di adres. Entrante dia 1 di december 2026, e adresnan lo wordo cambia automaticamente y e adres nobo lo bira esun oficial.
Gobierno ta pidi tur persona- y negoshinan afecta pa cuminsa uza e adres nobo den nan corespondencia y, unda cu ta aplicabel, riba nan website, papel di carta, facturanan, contractnan y otro documentonan administrativo desde e fecha ariba menciona.
Pa facilita e transicion, Gobierno a coordina cu Post Aruba pa tur corespondencia cu ainda ta bin cu e nomber di caya bieu durante e periodo di transicion sigui wordo entrega na e adres. Ademas, cada adres lo ricibi un envelop conmemorativo special.
E servicionan di Gobierno involucra, hunto cu Post Aruba, ta coordina e procesamento administrativo y practico di e cambio di adresnan.
E introduccion oficial di e cambio aki lo wordo anuncia publicamente durante un presentacion cortico.
Minister di Vivienda, Infrastructura, Servicio Interno y Telecomunicacion
drs. Rene Herdé ta gradici tur residente, comercio, institucion y pueblo afecta pa nan cooperacion cu e implementacion di e adresnan na J.H.A. (Henny) Eman Blvd.