Home » ELMAR ta celebra hunto cu San Nicolas e reapertura di su sucursal renoba

ELMAR ta celebra hunto cu San Nicolas e reapertura di su sucursal renoba

by Admin
0 comments 20 views

 

 

Oranjestad, Aruba – 19 di november 2026 – N.V. ELMAR a celebra e reapertura di su sucursal renoba na San Nicolas riba diabierna, 13 di november 2026, den presencia di autoridadnan, gerencia, empleadonan y miembronan di comunidad.

 

E celebracion a forma parti di ELMAR Holiday Tour 2026, un iniciativa durante cual ELMAR ta ilumina su sucursalnan y rotonde di ELMAR na San Nicolas pa temporada di fin di aña. E evento na San Nicolas a combina e inauguracion ceremonial di e sucursal renoba cu e cendemento di luznan di Pasco, creando un momento special pa comunidad di San Nicolas.

 

Durante e ceremonia, CEO di N.V. ELMAR, Edward Oduber, y Minister di Energia, Arthur Dowers, a dirigi palabra na esnan presente. Despues, nan a corta e cinta simbolicamente pa marca e reapertura di e sucursal. E minister, empleadonan y miembronan di comunidad cu tabata presente a haya un recorido den e facilidadnan renoba.

 

E renobacion ta parti di e compromiso continuo di ELMAR pa mehora su facilidadnan y calidad di servicio na comunidad. Cu e sucursal renoba, ELMAR ta fortalece su presencia na San Nicolas y ta ofrece un ambiente moderno y agradabel pa atende su clientenan.

 

E sucursal di ELMAR na San Nicolas lo habri oficialmente pa servicio na publico riba diabierna, 27 di november 2026 pa 7:45 a.m.

 

Tocante N.V. ELMAR

 

N.V. ELMAR ta e compania responsabel pa transmision y distribucion di energia electrico na Aruba. Cu mas di 75 aña di servicio, ELMAR ta sigui inverti den infrastructura, seguridad y calidad di servicio pa contribui na desaroyo di Aruba.

 

You may also like