Klik hier om de Nederlands versie te lezen
Click here to read the English version
Oranjestad, November 2026 – Aruba Fair Trade Authority (AFTA) a haci un investigacion di mercado den e sector di transporte di container pa Aruba. Ta estima cu e gastonan anual di carga pa productonan importa ta mas o menos Afl. 243 miyon. Esaki ta corresponde cu aproximadamente 10% te 13% di e balor di e productonan importa. Pa comparacion: e promedio di e porcentahe aki ta rond di 8,1% mundialmente y pa estadonan insular chikito den Caribe rond di 11,6%. Pues, costo di transporte di container pa Aruba ta relativamente halto.
Islanan chikito, manera Aruba, frecuentemente ta wordo confronta cu costo di transporte relativamente halto como consecuencia di nan mercado limita, dependencia di importacion y nan ubicacion pafor di e rutanan maritimo internacional principal. Pesey, costo di transporte ta un factor importante, pero no e unico factor cu ta contribui na e prijsnan relativamente halto na Aruba.
Distancia no ta decisivo
Un distancia maritimo mas cortico no ta nifica automaticamente un costo di transporte mas abou. Wafnan grandi situa riba rutanan principal ta procesa cantidadnan enorme di container, locual ta permiti companianan di transporte maritimo pa uza barconan mas grandi y parti nan gastonan entre mas container. Aruba ta situa pafor di e rutanan maritimo mundial principal y tin un volumen relativamente chikito di container. Pesey, e posibilidadnan pa beneficia di bentahanan di escala ta mas limita.
Ademas, Aruba ta importa hopi mas di loke e ta exporta. Pesey, hopi container mester wordo transporta bek bashi. E gastonan aki tambe finalmente ta forma parti di e costo di carga pa Aruba.
Mester stimula competencia
Mas competencia generalmente ta conduci na tarifanan mas abou y un mihor servicio. Actualmente, competencia riba e rutanan directo for di Merca, Hulanda y Corsou pa Aruba ta limita.
AFTA ta haci un apelacion na Gobierno y comerciantenan pa investiga hunto con por stimula entrada di companianan di transporte maritimo den e mercado di Aruba. Relaciona cu esaki, por sondea particularmente e posibilidad pa un segundo conexion directo for di Merca y e condicionnan necesario pa haci un conexion asina comercialmente atractivo y sostenibel.
Tambe por investiga si Aruba por tin un funcion logistico regional mas amplio of un funcion di transshipment, basta cu tin suficiente volumen structural di carga y interes di parti di companianan di transporte maritimo, y cu e bentahanan di escala y conectividad ta compensa e inversionnan necesario y e costonan adicional di transshipment.
Monopolionan ta exigi transparencia
Na Aruba tin monopolio den cierto partinan di e cadena di transporte di container: Aruba Stevedoring Company N.V. (ASTEC) ta opera e unico terminal di container di e isla, mientras cu Aruba Ports Authority N.V. (APA) ta opera e unico waf cu ta trata carga. Nan tarifanan tambe ta forma parti di e costo total di transporte di container.
AFTA no a haya indicacion cu e companianan aki a viola reglanan di competencia. Sinembargo, AFTA ta enfatisa cu transparencia ta particularmente importante ora companianan ta opera a base di derechonan exclusivo of un concesion exclusivo.
ASTEC ta opera e terminal di container a base di un contrato di concesion pa un periodo di 25 aña y ta paga APA 35,25% di su entrada bruto como pago di concesion. AFTA a investiga e efectonan economico di e structura di concesion aki. E investigacion ta mustra cu, durante e periodo 2014-2024, e pagonan di concesion cu APA a ricibi tabata constantemente mas halto cu e gastonan considera pa mantene, financia, administra y facilita e infrastructura relevante di waf.
Esaki ta duna motibo pa sigui evalua criticamente e efecto economico di e concesion y pa periodicamente reconsidera e structura di e concesion y su condicionnan. Den esaki mester tene cuenta cu e gastonan di e infrastructura relevante di waf, e pagonan di concesion ricibi y e importancia di transparencia.
P’esey AFTA ta recomenda ASTEC y APA pa aumenta e transparencia publico tocante tarifanan, gastonan, entradanan, inversionnan y e efecto economico di e concesion. Esaki por wordo logra door di, por ehempel, publica periodicamente informacion financiero relevante, manera estado financiero anual cu un especificacion di gastonan y entradanan pa e diferente actividadnan relevante.
Ademas, AFTA ta haya importante pa e mercado keda accesibel pa companianan nobo di transporte maritimo di container y cu tur peticion pa haya acceso na servicionan relevante di waf y terminal wordo trata bou di condicionnan razonabel. Ora un compania tin un posicion dominante, AFTA por, bou di cierto circunstancia y conforme e Ordenansa di Competencia, impone obligacionnan pa garantisa e acceso aki.
AFTA lo sigui monitorea desaroyonan den e sector di transporte di container. Companianan cu kier drenta e mercado y cu ta confronta obstaculonan pa drenta, ta wordo invita pa tuma contacto cu AFTA.
E estudio di mercado completo tocante e sector di transporte di container ta disponibel riba e website di AFTA: www.afta.aw
Tocante AFTA
Aruba Fair Trade Authority (AFTA) ta e autoridad independiente y imparcial di Aruba cu ta vigila e bon funcionamiento di mercado, den interes di empresanan y consumidornan. AFTA ta investiga mercadonan na Aruba y ta interveni ora tin violacion di e reglanan.