ORANJESTAD-Tur dia tin cacho na Aruba cu ta biba riba caya, sin awa, sin cuminda y sin un luga sigur pa drumi. Nan ta enfrenta hamber, sed, malesa, accidente y maltrato. Un realidad doloroso cu ta exigi mas conscientisacion y responsabilidad di nos comunidad.
Ningun cacho a scohe pa biba den e condicionnan aki. Nan ta sernan bibo cu ta sinti dolor, miedo y afecto. Nan ta depende di hende pa haya e cuido y proteccion cu nan merece.
Pone fin na sufrimento di animal no ta solamente cuestion di compasion, sino tambe di responsabilidad colectivo. Tin biaha un acto di amor ta cuminsa cu un decision simpel, no abandona un animal, ofrece ayudo na un cacho den necesidad of duna un animal un segunda oportunidad.
DVG ta haci un yamada na comunidad pa no bira indiferente pa e sufrimento di cacho riba caya. Cada ciudadano por contribui na un cambio, sea door di adopcion responsabel, sterilisacion, cuido adecuado of apoyando iniciativanan di bienestar animal.
Un Aruba cu menos cacho sufriendo riba caya ta cuminsa cu nos propio accionnan.
No mas cacho sufriendo riba caya. Adopta, sterilisa y proteha. Un doño responsabel ta haci e diferencia.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na [email protected]