Home » Minister Dowers a haci desvelo di Professor Doctor Ingeniero Filomeno A. (Boey) Marchena Building na WEB

Minister Dowers a haci desvelo di Professor Doctor Ingeniero Filomeno A. (Boey) Marchena Building na WEB

by Admin
0 comments 3 views

 

 

Diabierna 13 di november, Minister di Husticia, Integracion, Transporte Publico y Energia, mr. drs. Arthur Dowers, a atende e ceremonia inaugural di e centro di control nobo di WEB Aruba N.V., situa den e edificio historico di 1957 riba tereno di WEB, cu a keda completamente reconstrui y transforma den un centro state of the art.

E edificio, cu oficialmente ta carga e nomber di Professor Doctor Ingeniero Filomeno A. (Boey) Marchena, ta un reconocemento na e contribucion valioso di e ex-empleado di WEB, kende a hunga un rol importante den desaroyo di tecnologia di desalinacion di awa di laman pa produccion di awa di bebe na Aruba.

E centro di control nobo ta ekipa cu tecnologia moderno y instalacionnan sofistica cu ta permiti operadornan monitorea e proceso di produccion di awa di manera eficiente y confiabel. Ademas, su ubicacion strategico ta ofrece un bista directo riba e plantanan di produccion di awa.

E proyecto ta representa un inversion di Afl. 5,4 miyon y ta forma parti di un programa mas amplio di modernisacion di infrastructura di WEB Aruba N.V. E programa aki ta inclui, entre otro, renovacion di plantanan SWRO-1 y SWRO-2, construccion di un canal nobo pa entrada di awa di laman, tankinan nobo di awa y introduccion di meternan inteligente.

Pa Minister Dowers, e inversionnan aki ta di importancia strategico pa futuro di Aruba. Como isla cu ta depende di desalinacion di awa di laman pa produccion di awa di bebe, ta esencial pa sigui inverti den tecnologia, mantencion y modernisacion di infrastructura pa garantisa continuidad di e servicio aki.

E inauguracion ta representa no solamente un mehoracion di facilidadnan operacional di WEB, sino tambe un paso importante den fortalece e capacidad di produccion di awa pa por cumpli cu e demanda creciente di nos comunidad.

Durante e ceremonia, CEO di WEB Aruba N.V., Alfredo Koolman, a subraya e importancia di dedica e edificio na Boey Marchena, como reconocemento pa su contribucion na desaroyo di sector di awa na Aruba.

Como parti di e logro aki, WEB Aruba N.V. a haci un donacion di Afl. 10.000 na Aruba Scholarship Foundation, pa contribui na educacion tecnico di hobennan di Aruba.

Minister Dowers ta expresa su aprecio pa e compromiso di directiva y personal di WEB Aruba N.V., cu diariamente ta traha pa mantene un servicio esencial pa nos comunidad. E modernisacion continuo di infrastructura di awa ta fundamental pa siguridad di suministro y desaroyo sostenibel di Aruba.

 

You may also like