CAPE CANAVERAL, Florida – E nave espacial Voyager 1 di NASA a logra manda señal pa Mundo desde un distancia di un dia luz. E ta e prome aparato humano cu a alcanza e distancia historico aki den espacio interestelar.
Controladornan di vuelo a ricibi e señal di e nave espacial diabierna, exactamente 24 ora despues cu a manda e señal. E señal di radio a recore mas di 16.000 miyon mil (26.000 miyon kilometer) na velocidad di luz.
Lansa na 1977, Voyager 1 a pasa banda di Jupiter na 1979 y Saturn na 1980. Na 1990, e a tuma e famoso potret di Mundo conoci como “Pale Blue Dot”. Na 1998, e a bira e obheto traha pa hende cu ta mas leu di Tera, y na 2012, e a sali for di e region di influencia di Solo y drenta espacio interestelar.
Voyager 1 y su nave gemelo Voyager 2 ta e misionnan espacial mas largo cu NASA a mantene activo. Despues di casi 49 aña den espacio, ambos ta sigui manda informacion valioso pa Mundo, a pesar cu mayoria di nan instrumentonan a wordo paga pa conserva energia.
Actualmente, ambos nave ta move den espacio na un velocidad di aproximadamente 61.000 kilometer pa ora, usando energia nuclear genera pa plutonium.
Sin embargo, durante e fin di siman, e transmision di informacion scientifico y tecnico di Voyager 1 a stop repentinamente. NASA ta investiga e causa di e problema.
Cada un di e dos navenan ta carga un disco especial yama Golden Record, cu ta contene sonidonan di Mundo. E disc a wordo diseña como un capsula di tempo pa cualkier forma di bida cu eventualmente por topa cu e nave espacial.
NASA ta calcula cu e disconan cubri cu oro por dura mas di 1.000 miyon aña.
Fuente: Associated Press