Den capital di Fiji, un cantidad di droga cu tabata warda como evidencia a desaparece for di edificio di corte.
Na luga unda 39 kilo di cocaina mester tabata, polis a bin haya pa un gran parti cu ta hariña.
E descubrimento a wordo haci dia 15 di september den corte na Suva. Polis a bay check kiko a para di un lote grandi confisca na 2019. E homber cu a ser haya cu e droga e tempo ey, ta cumpliendo un sentencia di 23 aña. Como su caso ainda ta den apelacion, e evidencia mester a keda warda.
Ora nan a habri e paketenan, a resulta cu 32 bloki a wordo cambia. Na luga di cocaina, tabatin hariña den e empake nan. E otro shete blokinan a desaparece prome cu e control a cuminza. Medio local na Fiji a publica e noticia prome.
Recherchenan na e islanan a cuminza un investigacion y, segun nan mes, nan tin caba un sospechoso den mira. E persona ey aparentemente ta actualmente pafor di pais. Na mes momento, ta investigando tambe e personanan paden di corte cu tabata responsabel pa e maneho di e evidencianan. E Minister di Husticia ta enfatisa cu no tin excepcion y cu tur esnan cu ta envolvi lo wordo haci responsabel.
Cu Fiji ta aparece den casonan di e tipo aki no ta sorprende conocedornan. E archipielago ta situa na Oost di Australia, den centro di Oceano Pacifico, riba un ruta cu ta interesante pa contrabandistanan. Principalmente cocaina y crystal meth ta wordo transporta via e awanan ey.
Debi na e distancianan enorme y e supervision limita riba lama, organizacionnan criminal por opera relativamente facil, hopi biaha scondi tras di empresanan legal existente.
Nacionnan Uni a adverti caba na 2024 cu crimen organisa ta haya cada biaha mas control riba e region.
Tambe polis di Fiji mes ta mira den e ultimo añanan un aumento cla den e cantidad di casonan relaciona cu droga.