Home » Articulo 18 di e Derechonan di Mucha y e Rol Importante di Mayornan den e Desaroyo di Nan Yiu(nan): 

Articulo 18 di e Derechonan di Mucha y e Rol Importante di Mayornan den e Desaroyo di Nan Yiu(nan): 

by Admin
0 comments 16 views

 

“Ta tuma un comunidad pa yuda cria un mucha.” E dicho aki ta un berdad cu semper nos a bin ta scucha pa hopi tempo. E bienestar y desaroyo di un mucha no ta depende solamente di un persona, sino di un red di apoyo y sosten forma pa famia, scol, comunidad y profesionalnan cu ta traha cu mucha y hoben. Sin embargo, den tur e colaboracion aki, mayornan semper ta y lo keda e base principal den bida di un mucha. 

Articulo 18 di e Convencion di Nacionnan Uni riba e Derechonan di Mucha ta reconoce cu mayornan tin e responsabilidad principal pa cria y guia nan yiunan. E articulo ta pone enfasis riba e echo cu e bienestar di e mucha mester ta e preocupacion y tarea principal di mayornan, mientras cu comunidad y instancianan tin e deber di brinda e apoyo necesario pa yuda nan cumpli cu e tarea importante aki. 

E principio aki ta alinea directamente cu e mision y vision di Tienda di Educacion Aruba. Nos ta kere cu tur mucha tin derecho na un ambiente sigur, stabiel y stimulante den cual nan por crece riba area emocional, social, fisico y intelectual. Tambe nos ta kere cu mayornan y cuidadornan mester wordo fortaleci cu conocemento, instrumentonan y orientacion pa por guia nan yiunan cu confiansa y exito. 

Na Tienda di Educacion Aruba nos ta promove responsabilidad y rendicion di cuenta (accountability) di mayornan den e proceso di crianza. E prome leccionnan di bida ta cuminsa na cas. Ta aya un mucha ta siña tocante amor, respet, disciplina, confianza, empatia y perseverancia. Ningun institucion por reemplasa e relacion unico entre un mucha y su mayornan. 

Mescos cu nos ta enfatisa e rol primordial di mayornan, nos ta reconoce cu ningun famia mester carga e responsabilidad aki nan so. E comunidad tin un rol fundamental den apoya famianan aki na Aruba. Maestro, cuidadornan di mucha/ hoben, dokter, enfermero, psicologo, trahador social, terapista, coachnan deportivo y otro profesionalnan cu ta traha cu mucha y hoben tur ta contribui cu nan conocemento y experiencia pa promove e mihor interes di e mucha. Tambe dunadornan di trabou por tin un rol importante den esaki, door di sostene e mayor no solamente den nan rol como trahador pero tambe den nan rol como mayor. 

Un manera hopi cla pa comprende e colaboracion aki ta pensa riba construccion di un cas. Mayornan ta construi e fundeshi cu amor, seguridad, norma y balornan, guia y stabilidad. Banda di esaki e comunidad, hunto cu e diferente profesionalnan, ta yuda construi e cas riba e fundeshi ey. Nan ta agrega educacion, cuido medico, orientacion, proteccion y oportunidadnan di crecemento. Sin un fundeshi fuerte, e cas por tin dificultad pa mantene firme.

Sin apoyo di e comunidad, e cas no por alcanza tur su potencial. Ambos ta necesario pa crea un espacio unda un mucha y hoben por florece. 

Ora mayornan y comunidad ta traha hunto, e beneficio ta pa tur hende. Muchanan ta desaroya mas autoestima, resiliencia, bienestar emocional, exito escolar, deportivo etc. Mayornan ta sinti nan mes mas apoya y capacita den nan rol. Comunidad ta beneficia di ciudadano nan mas responsabel, respetuoso, saludabel y comprometi cu sociedad. 

E mensahe central di Articulo 18 no ta cu mayornan mester haci tur cos nan so, tampoco cu scolnan of profesionalnan mester asumi e responsabilidad principal. Al contrario, e articulo ta papia di un alianza. Mayornan ta keda e fuente principal di seguridad, amor y crecemento den bida di un mucha y hoben. Mientras cu e comunidad ta brinda e apoyo necesario pa e fundeshi ey por wordo fortaleci. 

Na Tienda di Educacion Aruba nos ta sigui comprometi cu fortalece e alianza aki. Door di empodera mayornan, conecta famianan cu recurso apropia y promove colaboracion entre diferente actor den nos comunidad, asina nos ta contribui hunto na un futuro mas fuerte pa nos muchanan y hoben nan. 

Nos ta kere cu di berdad “Ta tuma un comunidad pa yuda cria un mucha”, tambe ta hopi berdad cu e situacion ideal semper ta un mucha/ hoben cu ta haya den su mayornan amor incondicional, proteccion, guia y stabilidad. Ora e fundeshi familiar ta fuerte y e comunidad ta traha hunto pa sigui construi riba dje, nos tur ta gana: E mucha, e famia y Aruba henter. 

Romely Flanegin 

Directora 

Tienda di Educacion Aruba 

November, 2026

You may also like