Oranjestad, Aruba – Cas di Cultura ta orguyoso di anuncia cu su E Brasa Mediathon, dia 14 di november 2026, a recauda un impresionante AWG 310.000 na donacionnan confirma y promesanan pendiente pa cu e renobacion continuo di Aruba su Teatro Nacional. E logro aki ta refleha e generosidad di e comunidad di Aruba y su compromiso comparti pa conserva y revitalisa un di e institutonan cultural mas importante di e isla.
Bou di e tema Un Dia, Un Meta, e Mediathon di 12 ora a trese huntu artistanan, organisacionnan cultural, negoshinan y miembronan di comunidad pa un dia yena cu presentacionnan bibo, combersacionnan inspirativo y actividadnan pa recauda fondo. E evento a mustra no solamente e talento artistico di Aruba pero tambe e sentido fuerte di comunidad rond di Cas di Cultura y su futuro.
Un di e anuncionan significativo haci durante e Mediathon tabata e decision pa nombra e foyer di e teatro na honor di Maybeline Arends-Croes, un musico renombra, director di coro, docent di musica, y icono cultural respeta. Pa medio di su dedicacion di hopi tempo na musica y arte performativo, Arends-Croes a haci aportenan valioso na desaroyo cultural y herencia musical di Aruba. Nombrando e foyer na su honor ta reconoce su herencia y e rol importante cu ela hunga den enrikece e isla su identidad cultural, sigurando cu su contribucionnan ta sigui wordo celebra pa futuro generacionnan.
Cas di Cultura ta extende su mas profundo gratitud na pueblo di Aruba pa nan generosidad. Cada donacion, promesa y expresion di sosten a contribui na e logro aki y ta trece e teater un stap mas cerca di su futuro renoba.
Un aprecio special ta bai na tur sponsor, partner di media, anfitrion, artista, boluntario, y teamnan tecnico cu a contribui cu nan tempo, talento y recursonan pa hasi e Mediathon un exito.
Pa esnan cu a haci un promesa durante e Mediathon y ainda mester a completa nan contribucion, Cas di Cultura ta recorda nan amablemente cu pagonan por wordo transferi pa e cuenta di proyecto E Brasa. Pa preguntanan encuanto donacionnan, promesanan pendiente, confirmacionnan, of oportunidadnan pa bira miembro y sostene Cas di Cultura, publico ta bon bini pa tuma contacto cu e oficina na 582-1010 of manda un email na [email protected].
E fondonan recauda lo contribui na e proyecto di renobacion di E Brasa cu ta andando, cu tin como meta pa restaura y modernisa Cas di Cultura mientras ta fortalece su rol como un cas pa expresion artistico, educacion cultural, y conexion cu comunidad.
E exito di e E Brasa Mediathon ta un recordatorio poderoso di kiko por wordo logra ora un comunidad bini hunto pa un proposito comparti. Cas di Cultura ta profundamente agradecido na un y tur cu a yuda haci e logro aki posibel.
Tocante Cas di Cultura
Cas di Cultura ta un Teatro y Centro Cultural Nacional di Aruba, dedica na sostene arte performativo, cultiva talento local, y fortalece e isla su identidad cultural. Pa medio di su proyecto di renobacion di E Brasa, e institucion ta trahando pa un espacio cultural renoba cu lo sigui sirbi generacionnan di artista y publico.