ORANJESTAD – Awe mainta e homber Colombiano O.D.P.(36) a presenta dilanti Hues pa sucha su sentencia. E ta wordo haya culpabel cu dia 27 December 2025, a dal dos turista cu auto y core bay. E dama turista Wernet a fayece na Januari 2026 door di e heridanan sufri.
ARUBA NATIVE por a compronde cu Hues a tuma O.D.P. na malo di a bebe hopi alcohol na Bam Bam Café y despues bay core auto, dal dos turista y core bay. Hues a mustra cu O.D.P. a bay sconde e auto y O.D.P. mes a bay sconde. Ta despues di 1 luna, Polis a haya O.D.P. Hues a subi e castigo exigi pa Fiscal di 3 aña pa 4 aña di prison y 5 aña sin rijbewijs.
DAL TURISTA MATA Y CORE BAY
Via video conference, e dama M.Rodriguez, yiu di e victima L.Wernet, a mira y scucha e momento cu Hues a dicta sentencia. M.Rodriguez tabata hunto cu su mama y e tambe a wordo gedal door di e auto maneha pa O.D.P. riba 27 December 2025. Lamentablemente L.Wernet a fayece Januari 2026 di e heridanan cu el a sufri.
Hues a bisa cu e ta haya legalmente proba cu O.D.P., bao influencia di alcohol a dal Rodriguez y Wernet riba Caya Musica den oranan di anochi y a sigui core bay. O.D.P. a bay sconde e auto serca un amigo na Alto Vista y O.D.P. a bay sconde pa Polis. Hues a bisa cu e glasnan di e auto tabata getint y un di e luznan dilanti no tabata funciona bon. Na opinion di Hues, O.D.P. no a paga suficiente tino riba caminda y para pa laga e dos turistanan pasa. Hues a bisa cu O.D.P. ta culpabel di a core sin paga tino y no di a core irresponsabel.
Hues a rechaza declaracion di un testigo cu a bisa cu el a mira cu ta un truck lo a dal e victima. Hues a mustra cu for di camera di seguridad ta mira cu no tabata e truck sino e Honda Fit cu O.D.P. tabata core.
CHOFER TABATA HOPI BURACHI
Hues a bisa cu for di e video di seguridad na Ban Ban Café por a mira cu O.D.P. a bebe masha hopi bebida. Esey ta haci cu O.D.P. no tabata apto pa core auto. Imagenan di video ta mustra cu O.D.P. a sali for di Bam Bam Café ta cana burachi. Polis a papia cu coleganan di O.D.P. cu tabata den Bam Bam Café. Nan a bisa cu nan tur tabata bebe pisa y O.D.P. tambe. Tin imagen di video di seguridad caminda ta mira cu na altura di Fantastic Garden, O.P.D. tabata core den e parti di direccion contrario.
HUES A SUBI CASTIGO
Hues a bisa cu Fiscal a exigi 3 aña di prison y kita rijbewijs pa un periodo di 4 aña. Hues ta haya cu 27 December 2025, O.D.P. a dal dos turista y core bay. E dama Wernet a muri despues. Hues a sigui bisa cu O.D.P. a kita bida di un persona y a causa trauma pa e famia cu a perde nan ser keri. Hues ta tuma O.D.P. na malo pa a core burachi, dal dos turista y core bay. A laga e auto scondi na cas di un conoci. A keda scondi 1 luna largo y despues a wordo deteni.
Hues a mustra cu e carchi di castigo di O.D.P. ta mustra cu na 2022, O.D.P. a haya multa pa tabata core burachi y mester a sigui curso riba consecuencia di core auto bao influencia.
Hues a bisa cu apesar cu no tin investigacion riba e grado di alcohol, e ta conclui cu mirando e cantidad di alcohol cu O.D.P. a bebe, O.D.P. tabata hopi bou influencia. Hues a remarca cu ta door di O.D.P. mes, cu a bay sconde, no por a determina e grado di alcohol den su curpa. Ademas Hues a mustra cu O.D.P. a core bay despues di accidente. Hues a bisa cu Fiscal no a tene cuenta cu e parti aki ora el a exigi 3 aña di prison.
Hues ta haya cu e castigo mester aumenta mas. Hues a subi e castigo di 3 pa 4 aña di prison. El a condena O.D.P. na 4 aña di prison y 5 aña sin rijbewijs. Hues a bisa tambe cu e auto ta keda confisca.