Home » Relato completo: A bolbe pospone caso contra Fernandes Pedra cu a dal dos hende mata y core bay

Relato completo: A bolbe pospone caso contra Fernandes Pedra cu a dal dos hende mata y core bay

by Admin
0 comments 11 views

 

ORANJESTAD – Awe merdia a sigui cu e caso penal contra Chania Chante Fernandes Pedra (25), kende ta wordo acusa cu riba 4 Januari 2025 a dal mata e dama Josely Paulina Vasquez (65) y e homber Carlos David Vialez Valerio (54) y sigui core bay.

ARUBA NATIVE por a compronde cu despues di varios posponemento, a presenta un abogado. Hues a pospone e caso pa 27 November 2026.

Famianan di e victima y di e acusado tabata presente. E famianan di victima tabata sinta abao y e famia di acusado tabata sinta ariba.

Hues a repasa loke a sosode recien cu e keho contra dje. El a bisa cu e keho a wordo rechaza y cu lo sigui cu e caso manera e tabata promer cu e keho.

OTRO CARTA PA POSPONE CASO Y LAGA CHANIA LIBER

Hues a bisa cu Diamars merdia un carta a yega Corte for di Chania Fernandes Pedra. Hues a puntra mr. Odor cu e ta abogado y mr. Odor a bisa cu e no ta pasobra e no a haya tur e documentonan di e caso. Hues a bisa cu e carta largo di casi 14 pagina di Fernandes Pedra ta pidi pa pospone e caso. Hues a puntra si por spera mas carta y Chania a bisa cu no.

CUESTIONA CU NO A HAYA VIDEO DI ACCIDENTE

Den carta Chania ta bisa cu e ta sin abogado y no ta deshaci di su derecho di abogado. Awor Chania tin 10 luna sera y ta haya cu e caso no ta completo pasobra no tin cierto imagennan di video. Den e carta Chania ta repasa henter e proceso di abogado cu e no a haya y tambe cu e rechaza su peticion pa scucha testigo sin cu e tabatin abogado.

KIER PA INVESTIGA HUES

Hues a haci Chania pregunta pero el a bisa cu e ta haci uso di su derecho di silencio. Den e carta e ta cuestiona e forma con a keda sin lag’e haya e dos abogadonan pa scohe. E ta haya cu intencional Ministerio Publico a coordina pa esaki sosode y ta haya cu mester investiga esaki y tambe Hues.

NO KIER CONTESTA PREGUNTA DI HUES

Hues a puntr’e kico Chania kiermen cu esey y Chania a bisa cu e ta haci uso di su derecho di silencio. Den carta tambe Chania ta menciona cu lo por tin falsificacion di documento. El a bisa cu e kier un abogado cu lo por defende su interesnan. E kier haya un bon abogado cu lo bolbe pidi pa scucha testigonan y tambe pa reconstruccion di e accidente.

CUESTIONA VIOLACION DI PROCESO HUSTO

Chania ta haya cu tin violacion di un bon proceso di Corte. El a mustra cu den e documentonan di e caso, no tin imagenan di e video. Chania ta haya cu e no por bira victima di un maniobra inhusto crea pa Ministerio Publico pa e keda sin abogado. Chania ta haya cu Hues mester subi e pago di abogado pa asina e por haya un bon abogado y pa pospone e caso atrobe. Tambe el a pidi pa lag’e liber pa asina e por prepara e caso.

FISCAL TA REACCIONA

Fiscal ta remarca cu 4 November 2026 caba a papia di asistencia di abogado. Fiscal ta haya e peticion di investigacion no tin base. Fiscal a mustra cu Chaia tabata biba na Hulanda y ta compronde Hulandes. El a mustra cu e peticion di documentonan di e caso no ta al caso pasobra ya Chania a haya documentonan. Fiscal ta haya cu no tin motibo pa bolbe pospone e caso.

Hues a pospone e caso pa evalua. Hues a bolbe y a bisa cu e carta di casi 14 pagina, no tin nada nobo. E unico cos nobo ta e videonan di e accidente. Hues a bisa cu e abogado anterior y esun otro a haya e documentonan completo y video di e accidente. El a mustra cu Fiscal a bisa cu Chania a haya e documentonan. Hues a mustra cu durante interogacion di Polis, a mustra Chania e imagennan. Hues a sigui bisa cu den e caso anterior a mustra e imagennan. El a bisa cu si Chania kier bolbe mira nan, e por haci’e. E peticion pa haya e imagennan pa wak den KIA esey no ta posibel. Hues a remarca cu esaki ta di 6 caso cu ta purba trata y ainda no tin abogado. Na opinion di Hues, ta indesea cu no tin abogado y a constata anterior cu esey ta cay riba risico di Chania. Hues a bolbe rechaza e peticion pa pospone e caso y e peticion pa laga Chania liber tampoco no ta al caso.

BOLBE KEHA HUES

Ora cu Hues a rechaza e peticionnan, Chania a bolbe keha Hues. El a bisa cu e ta haya cu e Hues ta imparcial pa cu e caso. El a lesa varios pagina di carta cu e tabatin prepara caba kico e ta haya cu Hues ta bolbe rechaza su peticionnan. E ta pidi Corte pa no laga Hues trata su caso mas.

Hues a pospone e caso un rato y a bolbe pa bisa kico ta bay sosode. Hues a bisa cu el a papia cu e president di comision contra keho. Hof a trata e caso despues di 3.30.

CASO KEHO CONTRA HUES TRATA

Ta asina cu mr. Odor a bolbe presenta pa representa Chania. Miembronan di CEA tabata atento pa evita otro confrontacion entre famianan. Tambe por a mira Polis presente den Corte. E famianan di e victimanan y famia di e acusado a presenta den sala atrobe pa scucha tratamento di e keho contra Hues.

Hof a presenta y a bisa cu Hues a reacciona riba e keho via un mail. Hof a bisa cu Hues a splica pakico el a rechaza e peticion di Fernandes Pedra pa pospone e caso. Mr. Odor a bisa Hof segun ley, un acusado no por defende su mes sin abogado. E abogado a para riba cu Chania ta un hende y tin e derecho pa tin un abogado.

Fiscal a reacciona cu 6 November 2026 a duna Chania documentonan di e caso. El a mustra cu mr. Odor ta blo bisa cu e no a haya documentonan di e caso pero si el a pidi, e lo a hay’e. Hof a puntra Odor si e ta abogado. Odor a bisa cu e caso ta hopi grandi y e no tin tempo. Hof a remarca cu si e poseciona su mes como abogado, e por pidi pa pospone e caso. E abogado a bisa cu e caso ta asina complica cu Gobierno no ta bay pag’e pa e caso aki. Hof a bisa cu e ta compronde. Mr. Hatzmann ta representa e famia y a bisa cu e ta para tras di Fiscal.

Hof a pospone e caso un rato pa evalua y a bolbe cu un decision. Hof a bisa cu no tin argumentonan funda. Ta rechaza e keho cu no ta funda. Hof a bisa cu esaki ta di dos biaha cu ta keha e Hues y ambos ta no funda. Hof ta haya cu Chania ta abusa di su derecho pa keho. Hof a expresa cu no lo bay sigui atende keho y cu e caso ta sigui.

Ora Hues a bolbe pa trata e caso, mr. Odor a bisa cu e ta posiciona su mes como abogado di Chania. Hues a remarca cu anterior mr. Odor tabata abogado den e keho contra Hues y awor diripiente e ta abogado pa e caso penal. Fiscal a cuestiona cu ta lamentable cu ta usa tur forma pa pospone e caso. Fiscal a reclama mr. Odor cu e tabatin tur tempo den e caso anterior pa a representa Chania. Fiscal a bisa cu ta di seis biaha cu famianan di e victima ta bin Corte y cada ves ta pospone. El a mustra riba e confrontacion cu tabatin entre famianan den edificio di Corte. Fiscal ta haya cu pospone e caso pa 1 siman ta suficiente.

Abogado mr. Hatzmann di famia di e victimanan a cuestiona e forma con mr. Odor a actua. Na opinion di mr. Hatzmann, esaki ta un berguensa grandi pa abogado. E abogado ta haya cu tur sorto di wega ta wordo haci. El a pidi Hues pa pospone e caso y pa su siguiente dia sigui cu e tratamento.

Mr. Odor a bisa Hues cu ta un rato promer e mayornan di Chania a bis’e cu nan ta dispuesto pa pag’e.

Hues a bay pensa un rato riba posponemento y a bolbe. Hues a bisa cu e ta compronde e frustacion di Fiscal y abogado di victimanan. El a bisa cu e no ta compronde cu a tarda asina hopi promer cu a haya abogado. Hues a bisa otro siman Diabierna 27 November 2026 lo trata e caso.

You may also like