ORANJESTAD – E homber Ferdinand Erasmus (23), a presenta dilanti Hues den sala di Corte pero e caso a keda pospone.
ARUBA NATIVE por a compronde cu ainda investigacion no ta cla y tambe cu e sospechoso a bisa Hues cu e no a bisa Recherche tur cos y cu awor e kier papia e berdad.
DIFERENTE ACUSACION
Por a mira cu den sala di Corte tabata presente Tata di e victima Rayshon Kelly, cu un abogado.
Fiscal a bisa cu e tin diferente acusacion contra e sospechoso Ferdinand.
E promer acusacion ta cu riba 22 Juli 2026, intencional Ferdinand a tira e hoben Rayshon Kelly mata na veld di Winston. Fiscal a sigui bisa cu Ferdinand a tira diferente biaha.
E di dos acusacion ta cu e mesun dia hunto cu otro, Ferdinand tabata den posecion di arma di candela y balanan.
E di tres acusacion ta cu riba e mesun dia hunto cu otro, Ferdinand a cumpra un cantidad di marihuana, transporta e droga y tabatin e droga den posecion.
TIN OTRO GRUPO ENVOLVI
Fiscal a bisa Hues cu tin un otro grupo envolvi y a pospone e caso ey pa otro aña. Fiscal a sigui bisa cu e no sa cu lo ta bon pa trata e dos casonan hunto pero separa. El a bisa cu relaciona cu e caso contra Ferdinand, ainda Polis ta bezig y ta calcula cu na fin di November 2026 e procesverbaal di Recherche lo ta cla.
Fiscal a mustra cu tin peticion pa laga Reclasering traha raport y tambe laga Psycologo y Psychiater papia y check Ferdinand.
TRATA E CASONAN SEPARA
Fiscal a propone na Hues pa trata e caso contra Ferdinand riba 12 Februari 2027.
Fiscal a splica cu e otro grupo ta e grupo cu tabata hunto cu e victima Rayshon Kelly.
Hues a puntra si e ta practico pa trata tur dos caso hunto. Fiscal a propone cu lo por trata un grupo mainta y e otro grupo merdia of trata un caso riba un dia y e otro caso e siman despues.
SOSPECHOSO KIER PAPIA E BERDAD
Hues a bisa cu anterior, miembronan di Recherche a interoga Ferdinand y el a bisa cu e tabatin e arma den man pero e no tabata sa cu e arma tabatin bala aden. El a kere cu e arma tabata bashi.
Ferdinand a bisa Hues cu tin algun cos cu e no a declara na Recherche. El a bisa cu el a papia cu su mayornan y awor e kier papia e berdad. Ainda e lo mester bay declara na Recherche. El a bisa cu e caso ta traha riba dje. El a bisa cu ni e, ni e victima mester tabata eynan e anochi ey.
ABOGADO KIER MAS INVESTIGACION
Abogado mr. D.Croes a bisa Hues cu ora e procesverbaal keda cla, e kier tin e chens pa haci peticion pa mas investigacion. E abogado a remarca cu ainda no tin investigacion con e bala a bay. El a bisa cu lo ta bon pa Recherche haci un reconstruccion di e tiramento na veld di Winston.
LO TRATA CASO NA FEBRUARI 2027
Hues a bisa cu e pregunta ta si por trata e dos casonan hunto. Abogado mr. Croes a bisa cu lo ta mihor trata nan separa. Hues ta haya cu no ta logistico pa trata e dos casonan hunto. Hues a dicidi cu 24 Februari 2027, lo trata e caso penal contra Ferdinand 8.30 mainta y e siman despues lo trata e caso contra e otro grupo cu tabata hunto cu e victima.