Prome minister Mike Eman diasabra atardi a saluda tur boluntario envolvi cu E Brasa Mediathon, un evento special organisa pa recauda fondo pa e renovacion di Cas di Cultura. Durante su participacion, prome minister a reafirma e sosten di Gobierno na e proyecto y a haci un yamada na pueblo di Aruba, institucion y comercio pa uni forsa. E Brasa Mediathon, cu ta carga e lema “Renobando nos plataforma nacional”, ta un iniciativa di Cas di Cultura pa uni comunidad rond di un meta comun: renova y modernisa Teatro Nacional di Aruba, pa e por sigui sirbi como un escenario pa desaroyo artistico y cultural di futuro generacion.
Prome minister Eman a destaca e importancia di Cas di Cultura den historia di Aruba y e conexion profundo cu pueblo di Aruba tin cu e edificio aki. “Awe nos ta aki pa confirma nos sosten completo na e esfuerso pa e renovacion grandi di Cas di Cultura,” prome minister Eman a declara. El a indica cu Gobierno ya a haci un aporte financiero importante na e proyecto, pero cu e participacion di comunidad y sector priva ta esencial pa logra completa e renovacion. Asina a haci un yamada special na tur institucion, negoshi chikito y grandi y e industria turistico di Aruba, pa contribui cu donacion.
Cas di Cultura ta representa mucho mas cu solamente un edificio. E escenario aki a sirbi como un luga unda nos artistanan a expresa nan talento, unda musica, poesia y teatro a cobra bida, y unda e momentonan importante di historia cultural di Aruba a keda graba den memoria di nos pueblo. “Nos tur ta realisa cu e identidad di Aruba ta loke ta haci nos Aruba,” Eman a enfatisa. El a menciona cu cada cancion, cada poema, nos naturalesa, nos monumentonan y nos historia ta contribui na forma e identidad unico di Aruba.
Prome minister a reflexiona tambe riba e importancia emocional y historico di e sala di Cas di Cultura, unda durante añanan a nace composicionnan musical, a interpreta diferente obra y a presenta varios produccion artistico cu awe ta forma parti di nos patrimonio cultural. E escenario aki a duna bos na e sentimento, creatividad y talento di diferente generacion. Pa hopi artista, Cas di Cultura ta e luga unda nan a duna nan prome paso riba escenario y unda nan talento a haya oportunidad pa desaroya. E renovacion di Cas di Cultura ta, den e sentido aki, no solamente un inversion den un edificio, sino tambe den preservacion di e alma y identidad cultural di Aruba.
E Brasa Mediathon pa completa renovacion
Cas di Cultura, cu a habri su portanan na 1958, ta preparando un renovacion amplio pa modernisa su facilidadnan y ofrece nos artistanan y publico un teatro cu ta cumpli cu e necesidadnan di awe. Na principio di november, 65% di e financiamiento necesario pa e proyecto ya tabata asegura. E 35% restante ta necesario pa completa diferente trabou y instalacion esencial, incluyendo sistema electrico, airco, facilidad tecnico di teatro, accesibilidad y panel solar. Durante E Brasa Mediathon, artista, representante cultural y diferente medio di comunicacion ta uni forsa pa motiva comunidad pa contribui na e campaña. Publico por haci donacion digitalmente, via transferencia bancario, telefonicamente of personalmente na Cas di Cultura.