Minister di Vivienda, Infrastructura, Servicio Interno y Telecomunicacion, Rene Herdé, a celebra hunto cu directiva, personal y invitadonan, Bureau Interne Diensten (BID) su di 73 aña di existencia.
BID a wordo funda na aña 1953 como un departamento di registracion y distribuicion. BID a evoluciona durante mas di shete decada pa bira un departamento esencial pa e funcionamento di Gobierno di Aruba, cu un responsabilidad importante den registro, maneho, distribucion y conservacion di documentacion oficial.
Durante su discurso, minister Herdé a reconoce e dedicacion di tur generacion di funcionario y directiva cu a contribui na e desaroyo di e institucion.
“BID no solamente ta un departamento cu ta registra y distribui corespondencia, BID ta un wardado di informacion, un fuente di historia institucional y un sosten importante pa e funcionamento di Gobierno,” Minister Herdé a vocifera.
Mas leu di honra su historia, BID ta un vision riba modernisacion y digitalisacion. Entre e iniciativanan tin e implementacion di Decos Join Cloud Server, un sistema central di contacto cu cliente, un helpdesk digital y un archivo centralisa.
E meta ta pa fortalece e maneho di informacion, mehora comunicacion entre departamento y contribui na un Gobierno mas moderno, eficiente y digitalmente conecta.
Minister Herdé a conclui cu un mensahe di gradicimento na tur esnan cu a contribui na e 73 aña di historia di BID, alabes el a duna e personal actual palabranan di empuhe pa sigui traha cu orguyo, profesionalismo y dedicacion.