AZV a sigui e noticianan den medio di comunicacion cu ta raporta tocante e listanan di espera y presion financiero den cuido di hospital. Pa AZV, e accesibilidad y continuidad di cuido medico necesario pa tur su asegurado ta primordial, mescos cu e maneho prudente, transparente y eficiente di fondonan publico. Sin informacion actual manera a wordo presenta na Parlamento recientemente, AZV no por haci ahuste financiero.
E cifranan tocante listanan di espera menciona den medionan di comunicacion no a keda comparti anteriormente cu AZV a pesar di peticionnan di AZV pa haña mas informacion. Na e momentonan aki ta tumando lugar evaluacion y analisis pa expertonan financiero pa loke ta trata e causa di e presion di likides y e financiamento mas amplio di cuido di hospital. Esaki ta tuma lugar bou di direccion di e Ministerio di Salud Publico. En bista di esaki, AZV lo no drenta den discusion basa riba conceptonan preliminar of cifranan of dato cu no ta verifica ni tampoco conoci pa AZV. Pa un evaluacion al caso AZV lo warda riba e resultadonan final di e evaluacionnan aki.
Consciente di e consecuencianan cu e situacion aki por trece cu ne pa continuidad di cuido y pa evita e “afschaling” di cuido, AZV a duna un voorschot di 32 miyon florin riba e lumpsum di e 193 miyon cu hospital lo ricibi total e aña aki. Esaki banda di e pagonan regular.
Ademas recientemente AZV a informa hospital cu na momento cu e resultadonan di e evaluacionnan ta cla, lo drenta deliberacion cu hospital pa determina e siguiente pasonan.
Mara na e apoyo financiero adicional cu AZV a brinda, AZV a pidi hospital pa elimina e asina yama ‘afschaling’ cu ta ocasiona listanan di espera.
AZV no ta dispone di e informacion suministra na comision di Parlamento. Y a pidi hospital pa facilita AZV e datonan aki y pa hospital splica e listanan di espera cu dato obhetivo.
AZV su compromiso ta keda accesibilidad na cuido y maneho prudente, transparente y eficiente di fondonan publico.
Por ultimo, AZV ta informa cu aseguradonan cu ta enfrenta un lista di espera na hospital por tuma contacto cu AZV via nos number general: 5279900.