ORANJESTAD, ARUBA – Aruba Conservation Foundation (ACF) recientemente a organisa competencia di bowling pa su asociadonan, cu e obhetivo di fortalece e conexion entre coleganan, stimula trabou den grupo, y promove e balornan comparti di e organisacion.
E biodiversidad di Aruba a sirbi como inspiracion unda cada grupo a representa un especie di parha y a duna su propio toke na e competencia cu vestuario tematico, color y detaye creativo. Gruponan participante tabata: Shoco, Lora, Trupial, Blenchi y Warawara.
E premio pa Grupo mas Creativo a bay pa team Blenchi, cu a sobresali cu nan vestuario original, reflehando di un manera creativo e apariencia di e Blenchi.
Despues di dos ronda di bowling yen di entusiasmo y competencia amistoso, Grupo Trupial a conkista e titulo campeon, demostrando union, concentracion y perseverancia pa logra cu e punto mas halto di e anochi.
E tremendo ambiente tabata di ACF completo. Tanto esnan cu a hunga como esnan cu a bin apoya, animando otro y celebrando cada punto.
ACF ta manda palabra di pabien na cada grupo cu a participa y contribui na un anochi exitoso, yen di entretenimento.
E actividad a duna asociadonan di diferente departamento e oportunidad pa comparti den un ambiente ameno cu otro, fuera di e rutina di trabou. Fortaleciendo asina e lasonan entre e personanan cu ta traha tur dia pa cuida y proteha naturalesa di Aruba.
-Fin-