Ex-Prome Minister di Hulanda Ruud Lubbers a fayece diaranson ultimo na e edad di 78 aña. Durante su carera politico sr. Lubbers a sirbi su pais na 3 ocasion y pa 12 aña largo e tabata Prome Minister di Hulanda, esta di 1982 te cu 1994.
Sr. Lubbers tabata un persona clave den e logro di nos Status Aparte. Su comprension y dedicacion pa cu e deseo di nos pueblo pa su libertad ta hopi admirabel. Asina su persona tabata instrumental durante e Conferencia di Mesa Rondo cu a tuma lugar di 7 te cu 12 di maart 1983. Durante e conferencia aki a logra pa Hulanda reconoce e derecho di autodeterminacion di Aruba pa sali dia 1 di januari 1986 for di e constelacion Antiyano mediante un Status Aparte, pero como condicion cu mester mara e fecha di Status Aparte na un periodo di 10 aña cu lo culmina den Independencia di Aruba entrante 1 di januari 1996.
Alabes a ser conveni cu prome cu 1996 lo wordo teni un conferencia di evaluacion pa eventualmente examina e fecha di independencia di Aruba, den luz di evolucionnan estatal entre e paisnan den Reino.
Esnan cu a firma e acuerdo historico aki dia 12 di maart 1983 tabata ex-Prome Minister di Hulanda, Ruud Lubbers, ex-Prome Minister di Antiyas, Don Martina y e lider di e pueblo Arubano, Betico Croes.
Un frase historico cu a ser expresa na final di e Conferencia di Mesa Rondo door di ex-Prome Minister Lubbers tabata cu ‘de kogel is door de kerk’, cual frase ta simbolisa e culminacion di e lucha largo di Aruba pa yega na e logro di Status Aparte.
Un otro momento historico den e desaroyo estatal pa Aruba tabata dia 13 juli 1990, caminda ex-Prome Minister Ruud Lubbers hunto cu ex-Prome Minister Nelson Oduber a firma un protocol y caminda a scrap e fecha di independencia 1996 for di den Statuut (art. 62), pero a mantene e derecho pa un dia si e pueblo kier bira independiente, cu esaki ta posibel via un referendum y cu aprobacion di 2/3 parti di Parlamento.
Pues sin duda cu e dos echonan historico aki ta demostra cu sr. Ruud Lubbers tabatin e pueblo di Aruba na pecho y tabata desea tambe pa e pueblo di Aruba biba den libertad y felicidad. Pa esaki e pueblo Arubano ta keda eternamente agradecido.
Na e ocacion di fayecemento di sr. Lubbers, Prome Minister Evelyn Wever-Croes a manda un mensahe di pesame na sra, yiunan y demas famia di sr. Lubbers.
Cu sr. Ruud Lubbers sosega na Paz den Reino di Señor.