Gran acogida pa Labor Day Bash di Gerlien Croes

Diaranson 1 di mei ultimo parlamentario sra. mr. Gerlien Croes cu sosten di su team di voluntario a organisa un evento deportivo yama Labor Day Bash. Na sede di Aruba Juniors na Oranjestad a tene un torneo Knock Out di Softball, como tambe un Torneo di domino compaña pa un gran ambiente familiar cu a transcuri for di mainta te despues cu solo a baha.
A conta cu nada menos cu dies ekipo di softball. Despues cu tur a hunga y pasa bon, team nan Stingers, Black Out, Taxi-Boys, Yoyo Power y Quisqueya a resulta e gran vencedornan di e partidonan di softball. Pa loke ta trata domino, tabatin cuater ekipo di cual e final a resulta na fabor di Team Snor cu e score di 21-10 contra team Bou Palo, mientras cu Pariba Legends a gana Seroe Blanco 21-14. Fuera di e bon partidonan di softball y domino, tambe a disfruta di un wega di kickball di damas na final di evento.
Banda di tur e emocion di e weganan riba veld, e dia a sirbi tambe pa amigo y conoci bini hunto, fomentando asina mayor contacto social. Bar y cushina a haya hopi elogio y tur cos a caba na fin di dia, mientras cu tambe tabatin chens di dal poco paso riba pista danki na e animacion musical di Mellow Band.
Pa e politico hoben tabata un placer di por a combersa cu tur presente. Tabata un bon oportunidad tambe pa scucha di e preocupacionnan den comunidad e intercambia idea. Gerlien ta masha gradici y satisfecho cu e apoyo ricibi.
Croes: “Un danki di curason na tur ekipo cu a participa, na tur miembro y boluntario di e comision organisado, na tur bishitante y na tur cu a haci e evento posibel. Boso tur a aporta pa haci nos evento di Labor Day Bash un exito grandi!”
Gerlien Croes actualmente ta miembro independiente di parlamento, mama di dos yiu homber activo den deporte di baseball y futbol y sostenedor ferviente di actividadnan cu ta contribui na bin bek cu e union social cu Aruba tabata conoce. Pa haya sa mas di e proximo pasonan di Gerlien den tereno profesional y social, keda atento na su profiel di Facebook y instragram.