Un potret ta bisa mas cu mil palabra
ORANJESTAD – Diahuebs anochi 16 di mei, Prome Minister Evelyn Wever-Croes a wordo invita pa corta e cinta durante e inauguracion di e exposicion fotografico di studiantenan di Universidad di Aruba, “Problemanan Social y Solucionnan”.
E studiantenan cu a haci e exposicion ta di e facultad di Art & Science di Universidad di Aruba y ta studiando pa bira trahado social. Pa esaki e hobennan a sigui un curso di fotografia y por a mira un resultado hopi profesional. Prome Minister a menciona cu e tema di e exposicion “Problemanan Social y Solucionnan” ta uno hopi interesante ya cu e ta mustra a traves di e arte di un potret e problema, pero tambe e solucion pa esaki, cual ta hala atencion ya cu un problema tur hende por pensa riba dj’e pero e echo cu e studiantenan a busca pa cada problema un solucion y present’e den nan arte, esey ta di admira.
Durante e anochi aki Prome Minister a wordo deleita cu potretnan di calidad halto, impactante, exponi den e tecnica preto cu blanco y color y cada tecnica haciendo e impacto den e storia cu cada studiante a trece dilanti. Un potret ta bisa mas cu mil palabra y e arte cu a wordo exponi a refleha esaki mustrando cu cada problema tin un solucion den bida.
Por remarca cu un studiante, Joanne Ignacio, pa su proyecto a scoge e tema di Prome Minister di Aruba pa enfatisa e problema di e trato desigual di hende muhe na Aruba basa riba estudionan cu e mes a haci pa su proyecto. E solucion pa e problema aki, segun conclusionnan di Joanne, ta e echo cu un hende muhe ta e Prome Minister di Aruba na e momento aki. Esey ta kibra e plafon di glas y ta crea oportunidad pa mas hende muhe na Aruba.
E mandatario a keda impresiona cu e talento di e studiantenan, cu e calidad di e fotografia di e exposicion, pero specialmente el a keda impacta cu e storia cu cada hoben a conta di su potret. Esey ta mustra e calidad di trahadonan social cu Aruba lo tin den futuro. E ta un profesion hopi noble cu un tarea hopi importante.
Tin problemanan social serio na Aruba ya cu e pais ta den pleno recuperacion y cu e recuperacion ta bin cu retonan y problemanan social y Aruba mester di mas profesionalnan riba e tereno aki.
“Un exposicion masha interesante. Mi ta felicita e studiantenan pa e proyecto aki. Un pabien na cada un di boso pa expresa e mensahe cu boso ta trece dilanti di e forma aki. Danki pa scoge e profesion noble aki, Aruba tin mester di boso. Tambe mi ta gradici Universidad di Aruba, UNOCA, e mayornan y tur esnan cu a duna sosten na e studiantenan pa asina nan por a realisa e exposicion impresionante aki”, Prome Minister a expresa.
