Home » Cas di Cultura ta presenta Grease, the rock ‘n’ roll musical 

Cas di Cultura ta presenta Grease, the rock ‘n’ roll musical 

by Admin
0 comment 234 views

 

Cas di Cultura ta sumamente entusiasma pa presenta “Grease, the rock ‘n’ roll musical”. For di momento cu e team di Cas di Cultura a ricibi e licencia pa produci e musical aki na Aruba, e trabow grandi a cuminsa pa hinka e produccion den otro cual mester cumpli cu e standardnan internacional. 

E fin di aña aki, Aruba sigur lo por disfruta di un tremendo show, cu actuacion, canto y baile di talentonan local basa riba e buki original, cu musica y letra di Jim Jacobs y Warren Casey. 

Cas di Cultura ta haci un yamada na tur esnan cu ta desea di participa na Grease, the rock ‘n’ roll musical. Idealmente ta en busca di persona desde 15 aña cu por canta, baila y actua. Pero si bo ta domina bo bos y por baila of actua, esaki ta bo oportunidad pa participa na algo grandi y excitante. 

E audicionnan pa Grease, the rock ‘n’ roll musical lo tuma lugar riba: 

Diasabra, 23 di maart entre 6 – 10 PM 

Diadomingo, 24 di maart entre 4 – 7 PM 

E meta di e proyecto aki ta desaroyo di talento. Pa participa na e pruebanan, mester manda un e-mail na: [email protected]. Esnan cu inscribi via e-mail, lo ricibi un monologo (script cortico) y algun cantica, di cual por scoge un pa prepara di antemano. Un cantica di Grease cu tur persona por prepara di antemano ta: “We go together”. 

Esnan cu inscribi trempan lo tin mas tempo pa prepara nan mes pa e audicion. Riba e dianan di audicion lo tin prueba di baile pa wak e nivel di movecion y capacidad pa capta y corda coreografia. Pa e parti di baile no mester prepara di antemano. 

E storia di Grease ta tuma luga na “Rydell High School” na Chicago. E musical ta sigi e bida di dies diferente hoben cu ta atende e scol secundario, mientras nan ta nabega topiconan manera “peer pressure”, politica, balor y norma personal, amor y namoramento durante nan hubentud. 

E musical lo wordo dirigi door di un team cu hopi experencia, incluyendo director di teatro Ferdinand Franca. E instructor di baile ta Kevin Gumbs, cu lo dirigi e coreografia y Nicole van Eer lo ta encarga cu e parti di canto y coro. E instructornan, hunto cu e team tecnico y audiovisual di Cas di Cultura, ta cla pa prepara e scenario y e actornan, pa por presenta un musical di calidad halto na comunidad di Aruba.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio