Home » Raiz: E HARMONIA DI NOS COMUNIDAD TA DEN MAN DI E ORGANO MAS HALTO DI NOS PAIS

Raiz: E HARMONIA DI NOS COMUNIDAD TA DEN MAN DI E ORGANO MAS HALTO DI NOS PAIS

by Admin
0 comment 123 views

ORANJESTAD,ARUBA – MEI 7, 2024 — Amor no tin color, ni sexo, of religion.
Tin momentonan riba e caminda di bida cu nos ta topa cu crusadanan, unda e decisionnan cu nos tuma lo defini nos rumbo y futuro. Como Pais, como sociedad, nos a yega na un crusada crucial cu lo defini e tipo di sociedad cu nos ta.
E lucha pa e derecho di matrimonio entre pareha di mesun sexo no ta solamente tocante e legalisacion di un relacion cu a sali di amor; e ta tocante e reconocemento di e dignidad inherente y e balor di cada individuo.
Pa Plataforma Raiz e lucha aki no ta un lucha pa un ley, pero e ta un lucha basa riba e compromiso ancra den nos Statuut, pa harmonia.
E fundeshi di nos plataforma ta basa riba e filosofia di Sumak Kawsay: Biba bon, biba contento. Pa Raiz e no ta solamente un slogan of un dicho, sino un principio cu nos ta para p’e y ta encera e creacion y existencia di harmonia den nos sociedad. Un Aruba den harmonia ta un Aruba caminda union, solidaridad, respet, y empatia ta reina, y tur cu tin curason puro por sinti nan mes balora y cu nan tin un luga den nos Pais.
Raiz a planta e simia y e tera fertil ta nos principionan di igualdad, respet, inclusion y e fruta di nos cosecha, ta harmonia. E ley aki lo contribui na fortalece nos comunidad na unda no tin discriminacion ni diferencia pa tur esnan cu ta ser motiva door di amor di mesun sexo.
Ora nos nenga parehanan di mesun sexo e derecho pa casa, nos ta nenga nan e derecho humano basico di felicidad y bienestar. Nos ta manda un mensahe cu nan amor di algun manera ta menos valido, menos valioso pa kibra. Alabes nos ta reconoce nan libertad pa scoge nan propio bida, y nos ta maranan na cadenanan di limitacion pa realisacion propio.
Nos a wordo lanta den un Aruba cu ta orguyoso di su hospitailidad. Un Aruba cu ta orguyoso di por bisa cu riba nos baranca chikito aki tin espacio pa mas di 90 otro nacionalidad, como tambe diferente religionnan cu ta biba den harmonia cu otro apesar di nos diferencianan. No ta importa di unda bo ta bin, bo color di cuero, bo creencia of religion, Aruba tin un luga pa bo tambe. Con mas orguyoso nos lo ta ora di berdad y den tur sentido, nos por bisa cu na Aruba ningun hende ta wordo discrimina a base di ken e ta dicidi di stima. Cu tur hende por ta inclui cu e mesun derecho pa biba den harmonia cu otro?
E decision di 8 di mei ta keda den mannan di e personanan cu ta funciona den e organo di mas halto di nos Pais. E decision pa reconoce cu tur ser humano na Aruba tin e derecho fundamental di expresa nan stimacion pa un otro prohimo libremente.
Riba e crusada aki nos por scoge pa para na e banda corecto di historia, e banda cu ta defensor di amor riba prehucio, igualdad riba discriminacion. Nos por scoge pa harmonia, respet, y paz.
Diaranson dia 8 di mei ta momento pa nos mustra mundo henter cu na Aruba, amor no tin color.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio