Home » 6 sospechoso entre nan Crispin[Chris] Romero, ta presenta dilanti Hues pa caso Kwihi

6 sospechoso entre nan Crispin[Chris] Romero, ta presenta dilanti Hues pa caso Kwihi

by Admin
0 comments 6 views

ORANJESTAD – Dialuna mainta Hues di Corte di Husticia ta cuminsa cu tratamento di e caso penal cu Ministerio Publico a cuminsa contra 6 sospechoso.

ARUBA NATIVE por a compronde cu entre e sospechosonan ta ex minister Crispin Romero. Ministerio Publico tin acusacionnan serio contra e sospechosonan.

E caso ta hiba e nomber Kwihi caminda un di e sospechosonan ta Crispin Romero, ex minister di Transporte, Comunicacion y Sector Primario. E acusacionnan ta di malversacion, estafa, violacion di Belasting y abuso di su funcion como minister. E delitonan menciona mester a sosode entre November 2017 te cu October 2021. Na Februari 2023, autoridad a cuminsa haci investigacion na diferente casnan, caminda a confisca computer, administracion. Despues cu Hof di Corte Superior a duna e permiso, Ministerio Publico por a cuminsa cu e caso penal.

CASO PENAL

E sospechosonan cu ta presenta dilanti Hues ta: Crispin Romero, Eumar Koolman, Marilu Maduro Koolman, Rubinah Bernadina, Edison Briesen y Alison Briesen.

CASO PA KITA PROPIEDAD

Ademas di e caso penal, Ministerio Publico tambe ta cuminsa na mesun momento cu un caso pa kita propiedad, door di sospecho di malversacion, estafa y violacion di Belasting. E sospechosonan ta: Crispin Romero, Eumar Koolman, Marilu Maduro Koolman, Rubinah Bernadina y Edison Briesen.

PREPARACION PA TRATA CASO

E caso di awe mainta no ta wordo trata den su totalidad. E ta un “regie zitting”, caminda mas bien ta bay planea pa cuminsa trata e caso, caminda Hues lo kier sa si tin peticion di banda di abogadonan pa mas investigacion. Ta asina cu Fiscal tambe mester dicidi si ta di acuerdo cu e peticionnan. Na final ta Hues ta dicidi riba e peticionnan y Hues lo dicidi riba un fecha pa cuminsa tratamento di e caso.

You may also like