Na Aruba ta conoci cu 131 ta un organisacion cu banda di su propio proyectonan, ta desaroya y implementa proyectonan pa diferente organisacion Internacional aki na Aruba. Na 2023 131 a ser acerca pa Pan American Development Foundation pa desaroya un proyecto cu ta stimula empatia bao di hobenan local y migrante pa cu otro.
Discriminacion ta algo cu ultimo tempo mas y mas ta presenta na Aruba. Discriminacion ta ora un persona of un grupo di persona ta ser trata desigual door di nan rasa, color di cuero, idioma, creencia politico of otro, origen etnico of social, religion, sexo, edad, condicion fisico of mental, orientacion sexual of cualquier otro circunstancia. Discriminacion hopi biaha ta presenta door di xenofobia. Xenofobia ta ora un persona tin miedo of odio pa algo cu ta wordo mira como di afo of straño.
Dicriminacion ta haci daño na salud di un persona. Experiencia discriminacion ta doloroso, e ta duna un sintimento di no ta parti di un comunidad, y no mag di participa den e comunidad. Discriminacion ta zorg pa personanan perde confiansa den instancianan y ta sinti nanmes insigur.
Na 2023 131 a crea e proyecto ‘My Story’, y ta implementando ‘My Story’ actualmente na Aruba. ‘My Story’ ta un proyecto cu ta stimula empatia entre hobenan local y migrante, y asina aki ta reduci discriminacion y xenofobia. Danki na fondo propociona door di e ‘Bureau of Population, Refugees, and Migration’ (BPRM), 131 cohuntamente cu Pan American Development Foundation por a star cu implementacion di ‘My Story’ den 2024.
8 hoben local y 8 hoben migrante ta participando na ‘My Story’. E grupo di hobenan migrante ta consisti di hobenan naci na Colombia, Haiti y Venezuela. ‘My Story’ ta consisti di 6 sesion.
Durante e prome sesion e hobenan a ricibi workshop tocante Derecho di Mucha y Igualdad. Despues durante e di dos sesion e 8 hobenan local y e 8 hobenan migrante a bishita otro su hogar y asina aki a haya un bista mas profundo di con nan ta biba, cu ken nan ta biba, kico nan ta haci den nan tempo liber, cua scol nan ta bishita y con nan bida en general na Aruba ta. Un workshop di actuacion y creacion di pintura a sigui den e di tres sesion. Durante sesion 4 e hobenan a crea un pintura cu ta expresa nan experiencia di bida na Aruba, experiencia di nan bishita y nan sintimentonan. Despues di e prome cuatro sesionan e hobenan hunto cu un ‘film coach’ lo crea un ‘script’ pa un ‘short movie’. E contenido di e ‘script’ lo encera e experiencia di e hobenan durante nan bishita na otro y nan experiencia di bida na Aruba. Ariba e ultimo dia cu ta sesion 6, e ‘short movie’ lo ser crea y e hobenan lo ta e actornan den e ‘short movie’.
Ariba dia 28 di juni e ‘short movie’ lo ser estrena. Durante e estreno lo tin un exposicion di e creacionan di e hobenan.
Pa mas informacion tocante ‘My Story’ por tuma contacto cu 131 via nos website: 131.aw, facebook: https://www.facebook.com/aruba.131/, email: [email protected] of telefon 5886138/ 5884011.