BACKGROUND
Na 2003, e Organisacion Internacional di Trabou (ILO) a cuminza observa e Dia Mundial aki pa enfatisa e prevencion di accidente y malesanan na pia di trabou, capitalisando riba e forsa tradicional di ILO pa cu dialogo social y dialogo .
E celebracion aki ta forma parti integral di e Strategia Global pa Seguridad y Salud na Trabou di ILO, manera documenta den e Conclusionan di e Conferencia Internacional di Labor na juni 2003. Un di e pilarnan principal di e Strategia Global ta promocion, y e Dia Mundial pa Seguridad y Salud na Trabou ta un instrumento clave pa eleva e concientisacion con pa haci trabou mas sigur y mas saludabel y pa enfoca riba e necesidad pa eleva e perfil politico di seguridad y salud na trabou.
28 di april tambe ta e Dia Internacional di Conmemoracion di Trahadornan Morto y Herida organisa pa e movimiento di sindicalismo na nivel mundial desde 1996.
Prevencion di accidente di trabou y enfermedad di ocupacion
E Dia Mundial pa Seguridad y Salud na Trabou riba 28 april ta promove prevencion di accidente y enfermedadnan ocupacional (beroepsziekten occupational diseases) na nivel global.
E ta un campaña di concientisacion pa enfoca mundialmente riba a magnitud di e problema y con pa promove y crea un cultura di seguridad y salud na trabou pa yuda reduci e cantidad di morto y lesionan causa pa trabou.
Cada un di nos ta responsabel pa evita morto y lesionan na pia di trabou.
Gobiernonan ta responsabel pa proporciona e infrastructura (ley y servicio) necesario pa garantisa cu e trahadornan sigui ta empleabel (arbeidsgeschikt) y cu empresanan por florece; esaki ta inclui e desaroyo di un política y un programa nacional y un sistema di inspeccion pa haci cumpli cu legislacion y e maneho di seguridad y salud na trabou.E dunadornan di trabou ta responsabel pa garantisa cu e lugar di trabou ta sigur y saludabel. E trahadornan ta responsabel pa traha cu seguridad y proteha nan mes y no pone otro na peliger y pa conoce nan derecho y participa den e implementacion di medida preventivo.
Riesgo emergente na trabou
Riesgo ocupacional laboral nobo y emergente por ser causa pa inovacion tecnico of dor di cambio social of organisacional, manera:
- Tecnologia nobo of proceso di produccion, p.e. nanotecnologia, biotecnologia
- Condicionan nobo di trabou, p.e. mayor carga di tarea pa haci na trabou, intensificacion di trabou debi na reduccion di personal, mal condicion causa dor di migracion en busca di mihor trabou, empleo den e economia informal
- Forma emergente di trabou, p.e. trabou pa proprio cuenta, subcontratacion, contrato temporal
Esaki nan por ser mas ampliamente reconoci a traves di un mihor comprension cientifico, p.e. e efectonan di riesgonan ergonomico di trastorno musculoeskeletal.
Y nan por ta influencia pa cambionan den e percepcion di e importancia di cierto factor di riesgo, manera efectonan di factor psicosocial riba stress relaciona na trabou
TEMA 2024: E impactonan di cambio climatico riba seguridad y salud na trabou
Cambio climatico ya tin grave repercusionan pa e seguridad y salud di trahadornan den tur region di mundo. Trahadornan ta haña nan mes mas exponi entre otro na e riesgonan di cambio climatico, pero hopi biaha nan no tin otro manera sino sigui traha aunke e condicionan ta peligroso.
E medidanan di proteccion pa seguridad y salud na trabou na escala mundial tawata tin dificultad pa adapta na e evolucion rapido di e riesgonan deriva di cambio climatico, loke a provoca mortalidad y morbilidad di trahadornan.
Organisacion Internacional di Trabou (ILO) a saca un rapport 22 april 2024 titula “Ensuring Safety and Health at Work in a Changing Climate”, esta asegurando seguridad y salud na trabou den un clima cu ta cambiando.
E rapport aki ta presenta datonan fundamental di e efectonan di cambio climatico riba seguridad y salud na trabou, cu e fin di yama e atencion riba e menazanan mundial pa e salud cual e trahadornan ta enfrenta actualmente. E rapport ta cubri e siguiente cuestionan clave
- Calor excesivo
- Radiacion ultravioleta (UV)
- Fenomenonan meteorologico extremo
- Contaminacion di aire na e lugar di trabou
- Enfermedadnan transmiti pa vectornan (sangura, carpata y otro animal y insecto)
- Productonan agrochimico
Considerando cu Conseho di Ministro di Aruba riba 29 november 2022 a vota na favor (decision BE-73/22) pa institui un “National Climate Resilience Council” (NCRC, Conseho Nacional pa Resiliencia Climatico) y mediante un Ministeriële Beschikking di 21 maart 2023, publica den Landscourant di 11 april 2023 (LC2023.008) a oficialmenta institui dicho organismo.
Loke ta resalta cu pa loke ta e departamentonan di gobierno cu tin representante den e Conseho aki ta ausente Departamento di Enseñanza, e departamentonan di labor, Santa Rosa y Fundacion Parke Nacional Aruba (Aruba Conservation Foundation).
Por bisa cu tur seis tipo di efectonan di cambio climatico señala den e rapport pa trahador humano tambe den un forma general ta conta pa bida animal y vegetal.
Pues tin cu conclui cu e mandato di e Conseho Nacional pa Resiliencia Climatico no ta tene cuenta cu ser humano y bida animal y vegetal den un forma adecuado, y cu e tema di seguridad y salud na trabou aparentemente of a ser lubida of no tin mucho prioridad pa Gobierno.