Santa Cruz – Diadomingo algo pasa di 5:30 a.m polis a bay cu urgencia bocht di Santa Cruz cu ta bay pa Piedra Plat, eynan un auto a accidenta y un ocupante tawata mustra seriamente herida.
Esaki a pone cu patruya di Santa Cruz a yega lihe e sitio pa asina rapidamente saca afo situacion di e victima.
Nissan Cube a kibra cura di cas y palo di luz
Na yegada agentenan a constata cu e persona herida cu a resulta cu ta un dama hoben ta for di tino y tin un kap serio na frenta. Ambulance ya tawata na caminda pa e sitio.
Paramediconan a yega e sitio
Paramediconan por a “constata” cu e dama hoben aki tawata bou influencia tambe y hunto cu ne su amiga cu tawata bastante bou influencia, mirando cu e no por a para ariba su pia. E ultimo aki a wordo poni den boei.
Dama hiba pa ambulance
Durante cu Paramediconan a pone e dama ariba e stretcher e la cuminsa bira poco onrustig y nan mester wante pa e no cay di stretcher. E la wordo hiba direccion Hospitaal cu golpi serio na frenta.
Transportwagen hiba amiga burachi
Transportwagen tambe a yega y ta hiba e amiga cu posiblemente ta chauffeur di e Nissan Cube pa warda. E la medio resisti un poco pero agentenan a splike e procedura y a calma. Na warda e lo a wordo presenta dilanti un Sub Fiscal.
Na final takelwagen mester a yega pa ranca e auto cu a kibra parti di un cura di cas y tambe causa daño na un palo di luz di Elmar, cu tambe a wordo poni na altura.
