Como parti di establecimento di un Family Justice Center (FJC) na Aruba, representantenan di European Family Justice Center Alliance (EFJCA), FIER Nederland y Signs of Safety a haci un bishita di trabao na Aruba. Gobernador di Aruba, Su Excelencia Alfonso Boekhoudt, riba diahuebs 1 di juli 2021 a ricibi e delegacion pa un audiencia na Cas Ceremonial di Gobernador.
Lo realisa un centro multidisciplinario unda cu, for di un solo localidad, instancianan di husticia y di ayudo ta duna servicio na victimanan di violencia domestico, di abuso infantil y di violencia sexual.
Durante di e audiencia, a informa Gobernador tocante di e historia, e metanan, e resultadonan cu ya a logra y e plannan pa futuro.
Riba e prome potret: señor Bert Groen (Presidente EFJCA), señora Linda Terpstra (Director FIER Nederland) y S.E. Gobernador Boekhoudt. Riba e di dos potret: señora Marion Henneman (Signs of Safety trainer, Omada Training en Coaching), señora Daphny Tecklenborg (Projectleider FJC Aruba) y S.E. Gobernador Boekhoudt.
Potret: © Kabinet Gouverneur Aruba