Oranjestad – 17 di mei 2024 – Aruba Bank ta sumamente orguyoso di a patrocina e exposicion “Fotografia cu enfoke riba problema y solucion social”, un iniciativa desplega door di e departamento di “Social Work and Development” di e facultad di Arte y Ciencia na Universidad di Aruba.
E projecto aki ta parti di e curso “Caribbean Social Issues and Change”, unda cu studiantenan a investiga y desaroya solucionnan sostenibel pa problemanan social na Aruba.
E studiantenan a logra captura e esencia di varios desafio social por medio di fotografia, y a demonstra posibel solucionnan visualmente atractivo. E resultadonan di nan trabou lo ta na exposicion na UNOCA desde 16 di mei 2024 te cu 14 di juni 2024, di 9:00 am te cu 3:00 pm.
Aruba Bank ta invita henter comunidad di Aruba pa bishita e exposicion aki y pa participa activamente den dialogonan critico tocante e problematica y solucionnan social. Aruba Bank ta convenci cu apoyando e iniciativa educativo aki, ta contribui na un comunidad bon informa y educa.