Home » WEB ARUBA Y WÄRTSILÄ A FIRMA ‘FINAL TAKE OVER’ DI PLANTA RECIP IV

WEB ARUBA Y WÄRTSILÄ A FIRMA ‘FINAL TAKE OVER’ DI PLANTA RECIP IV

by Admin
0 comment 124 views

ORANJESTAD – Diabierna dia 17 di mei ultimo WEB Aruba y Wärtsilä Finland Oy a firma e ‘final take over’ di planta RECIP IV. Cu e firmamento aki, Wärtsilä formalmente a entrega e planta na WEB Aruba. Operacion di RECIP IV ta conduci na un reduccion drastico di combustibel, na menos emision di gas den medio ambiente y na tarifanan di coriente sostenibel. Ademas, na momento di interupcion di suministro di coriente, e tempo pa recupera ta hopi mas cortico cu den pasado. E ceremonia a tuma lugar den planta di WEB den compania di diferente mandatario, diferente partner di proyecto, empleadonan y contratistanan di e compania di awa y energia. Pa e ocasion aki a haci un donacion total di Awg. 27.500,- na diferente instancia educativo, social y deportivo.

WEB Aruba a inicia proyecto RECIP IV na 2019 cu e meta pa bay over 100% riba e tecnologia reciprocal. Planta RECIP IV tawata planea pa bay den operacion na 2021. Sinembargo e tardanza debi na e pandemia COVID-19 y despues algun defecto inicial a pone cu e entrega formal di e planta por a tuma lugar te awor. Cu ayudo di WEB su team di proyecto y departamentonan di produccion, mantension, Warehouse, asuntonan tecnico y contratistanan a logra coregi esakinan. Un palabra di danki ta bay na comunidad cu mester a experencia interupcion di suministro di coriente pa motibo di e defectonan inicial.

Construccion di e planta RECIP IV a encera e parti mecanico y electrico, e parti di seguridad, e parti civil y structural, e parti di automatisacion y last but not least, e parti di cumplimento cu tur regulacion. E planta aki, cu hopi componente operacional, ta di tal magnitud cu a tuma mas tempo pa haci e transicion y pone e planta completo den operacion confiabel pa produci energia.

Mas Eficiencia y Menos emision
E prome motornan RECIP a bay den operacion na WEB na aña 2006. Cu esey a inicia e caminda pa reduci uzo di e Heavy Fuel Oil costoso. E tempo ey e motibo principal pa a introduci e tecnologia di RECIP tawata pa hisa eficiencia. Na 2013 tawata obvio cu e eficiencia aki no tawata solamente pa reduci gasto, pero mas importante pa baha emision di gas den medio ambiente.

Awendia WEB ta conta cu un produccion di energia, uzando un mix di energia di solo y di biento, pero tambe di almacenahe di energia y cu IGMS, e sistema di maneho di energia inteligente. Cu tur e esfuersonan aki, WEB Aruba a logra baha consumo di Heavy Fuel Oil cu casi 60% desde 2005. Sinembargo, e averahe di demanda di coriente di nos isla, compara cu aña 2023, a subi cu 10% cual ta hopi halto. Esaki por ta debi na aumento di temperatura pero tambe debi na crecemento economico y turistico.

E planta RECIP IV ta consisti di 6 motor cu un capacidad total di 102 Megawatt. Aparte di planta RECIP IV, produccion di WEB Aruba ta consisti di plantanan RECIP I y II (47 MW), RECIP III (45 MW), turbina di gas (22 MW), energia di biento (30 MW), energia solar (6 MW) y energia almacena (1 MW).

Donacion
Manera acostumbra, pa celebra proyectonan nobo, WEB hunto cu su partnernan a haci donacion na diferente instancia educativo, social y deportivo pa asina contribui na un comunidad sostenibel.
E prome donacion di parti di WEB y Twentse Kabelfabriek pa un suma di Awg. 7.500,- a bay pa Colegio San Antonio. E di dos donacion di Awg. 5.000,- di parti di ACEFIRM y Traeger Brothers a bay pa Stichting Casa Cuna Progreso. ALBO Aruba hunto cu PMEC a otorga un donacion di Awg. 5.000,- na Fundacion Centro di Pesca Hadicurari. E di cuater donacion di Awg. 5.000,- AMAST y Florida Aqua Store a haci na Club Sport Boys. E ultimo donacion di Awg. 5.000,- di parti di UTLT y New Wave a bay pa Hope Foundation Little League for Girls.

Innovacion y cambio
WEB Aruba ta gradici su team di proyecto y partner principal Wärtsilä pa e esfuersonan inspirativo pa explora y implementa alternativanan di energia pa cambia e forma di genera energia pa isla di Aruba. WEB Aruba e aña aki ta cumpli 92 aña y ta dedica na ta un di e companianan mas innovativo den Caribe. E ta haci su esfuerso pa ta un pionero den implementacion di cambio dentro di industria di produccion di awa y energia. Asina WEB ta sigui desaroya, como compania responsabel pa awa y coriente pa comunidad y economia di Aruba.

Algun siman atras a firma inicio di e proyecto pa un planta nobo di awa, SWRO III. Tanto SWRO III, como RECIP IV ta forma parti di WEB su strategia corporativo. y di proyectonan riba termino inmediato, mediano y pa largo plaso. WEB su red di distribucion di awa tambe conoce adaptacion y mantencion constante pa por keda garantisa suministro di awa. Tur esaki WEB Aruba ta haci pa por keda cumpli cu e demanda creciente di awa y coriente.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio