Home International Toque de queda pa henter Francia

Toque de queda pa henter Francia

SHARE

PARIS – Tur Frances mester keda cas entre 6 or di atardi y 6 or di mainta. Esaki, como parti di e medidanan necesario cu a wordo implementa pa combati coronavirus. Prome minister Jean Castex a declara esaki recientemente.
Den 25 departamento ya caba tawata tin e toque de queda aki. Den e otro 77 departamentonan e Francesnan tawata permiti pa keda pafo te 8 or di anochi, pero segun e prome minister esaki no ta posibel mas.
Segun Stanislas Guerini, e lider di e partido mas grandi den gobierno Frances, e medida aki ta importante pa elimina e ‘efecto di aperitivo’. Cu esaki e kiermen encuentronan social caminda hendenan ta bai bebe prome cu cena.
Bo mag di bai trabou of bai bo cas of busca bo yiunan na scol of creche. Scolnan ta keda habri, pero sin les di gymnastiek. Castex a bisa cu e ta haciendo todo lo posibel pa evita ceramento di scolnan. E ceramento di scolnan durante e prome ola tawata tin un efecto hopi negativo, segun e prome minister. E intencion ta pa tur luna haci un minimo di 1 miyon di test na scolnan.
Castex a cataloga e situacion na Francia como uno preocupante. E cantidad di contagio no kier baha y e preshon ariba hospitalnan ta keda halto. Mientrastanto 69.000 hende a muri na Francia a consecuencia di coronavirus.
Segun gobierno Frances, e virus ta plamando menos liher den e departamentonan na unda tin toque de queda di 12 ora y na unda e poblacion mester keda paden henter anochi.