Home Corte Door cu e banco a nenga di habri cuenta Otmar Oduber...

Door cu e banco a nenga di habri cuenta Otmar Oduber director di Bochincha a cumisa caso contra Aruba Bank

SHARE

ORANJESTAD – Awe mainta a tuma lugar e caso sumario cu señor Otmar Oduber, director di Bochincha a cuminsa contra Aruba Bank. Tratamento di e caso aki no a sosode den edificio di Corte sino den un edificio banda di e ex panaderia pega cu e edificio di Corte.

   Aruba Native por a compronde cu e discusion tabata pakico Aruba Bank a nenga di habri cuenta pa señor Oduber como director di Bochincha. A wordo mustra cu a haci peticion na Aruba Bank caminda cu documentonan a mustra cu ta transparente y cu ta entradanan lo por deposita tur dia.

   A cuestiona e hecho cu Aruba Bank a bisa señor Oduber cu door cu e ta sospechoso den un escandalo, no ta habri cuenta. Esaki ta duna un mal imagen na e banco.

   Di parti di Aruba Bank a wordo mustra cu ora un cliente pidi pa habri cuenta pa negoshi mester haci investigacion profundo di e cliente y mester cumpli cu reglanan stipula pa Banco Central. E reglanan ta hopi estricto pa cu labamento di placa y ora tin hende cu ta wordo sospecha di ta envolvi den escandalo, no ta habri cuenta. Na Maart 2020, Ministerio Publico a mustra cu señor Oduber ta envolvi den un escandalo.

   Aruba Bank a bisa cu for di Juli 2020, señor Oduber a wordo bisa cu banco no ta habri cuenta pa su negoshi. For di Juli 2020 no a haci nada y awor ta bin cu un caso sumario. Parce cu a cuminsa opera e negoshi na December 2020 sin cu e tin un cuenta bancario.

Hues a sera tratamento di e caso y a bisa cu dia 3 Februari 2021 lo tin sentencia.