Home Local Hendenan cu ta Covid-19 positivo sin sa, ta cana rond plama virus!

Hendenan cu ta Covid-19 positivo sin sa, ta cana rond plama virus!

SHARE

ORANJESTAD, Aruba –14 januari 2021: Informacion cu Departamento di Salud Publico ta ricibiendo for di dokternan di cas y tambe for di entrevistanan cu ta wordo ehecuta cu esnan cu a test positivo pa Covid-19 ta cu nan a pensa cu ta griep nan tin.

Mas y mas ta tumando nota di pashentnan cu na momento di test positivo ta señala cu nan tin algun dia malo caba pero no a haya necesario pa yama dokter di cas pa test, pasobra nan a pensa cu ta griep nan tin. Na varios ocacion a informa na comunidad cu no ta tur persona ta experencia covid-19 di mes forma. Tin persona cu ta bira hopi malo y tin otro cu ta haya sintomanan hopi leve.

Cu bo tin sintoma hopi leve cu ta parecido na griep, alergia of sinus ta motibo pa test pa covid. Mientras cu bo persona ta cana rond cu e sintomanan sin un diagnostico concreto bo ta contagiando otro persona cu Covid-19 Corona virus sin cu bo ta na altura.

Dokternan di cas y tambe Departamento di Salud Publico ta preocupa cu e desaroyo aki cu ta sigui conduci na aumento di casonan na Aruba. E suplica ta bay un bes mas na comunidad pa na indicacion di minimo di sintoma, no basila pero yama bo dokter di cas pa bo por bin na remarke pa un test mas pronto posibel pa di e forma aki stop e transmision di e virus.

Pa mas informacion ‘Like’ nos page riba facebook “Directie Volksgezondheid DVG Aruba” y keda bon informa.