Home » DIA MUNDIAL DI LIBERTAD DI PRENSA, 3 MEI 2024

DIA MUNDIAL DI LIBERTAD DI PRENSA, 3 MEI 2024

by Admin
0 comment 77 views

 

 

INTRODUCCION

Dia 3 mei a ser proclama como Dia Mundial di Libertad di Prensa na 1993 pa Asamblea General di Nacionan Uni, siguiendo un recomendacion di e Conferencia General di UNESCO.

E fecha a ser escogi pa coincidi cu e aniversario di e Declaracion di Windhoek, den cual representantenan di medionan di comunicacion africano cu tawata participa den un seminario organiza pa UNESCO den e capital di Namibia, a crea un documento den cual a formula e principionan di e libertad di prensa.

Segun estableci pa articulo 19 di e Declaracion Universal di Derechonan Humano, e libertad di expresion ta un derecho fundamental: “Tur individuo tin e derecho di libertad di opinion y expresion; e derecho ta inclui e derechonan di no ser molesta a causa di bo opinion, investiga y recibi informacion y opinion, y e difusion di esakinan sin limitacion di frontera, y mediante cualkier medio di expresion”.

Teniendo e derecho aki na cuenta, Dia Mundial di Libertad di Prensa ta un oportunidad pa recorda e gobiernonan cu ta necesario respeta libertad di expresion y pa refleha riba e problemanan di libertad di prensa y e etica profesional. E ta un oportunidad pa:

  1. Celebra e principionan fundamental di libertad di prensa. 
  2. Evalua e situacion di libertad di prensa na mundo. 
  3. Defende e medionan di comunicacion contra atentado riba nan independencia. 
  4. Rindi homenahe na periodista cu a perde nan bida cumpliendo cu nan deber.

 

2024 TEMA: PRENSA PA PLANETA. PERIODISMO DEN CARA DI E CRISIS AMBIENTAL 

E tema pa Dia Mundial di Libertad di Prensa ta “A Press for the Planet: Journalism in the face of the environmental crisis”, esta “Prensa pa Planeta: Periodismo den cara di e crisis ambiental.”

Na 2024 Dia Mundial di Libertad di Prensa ta dedica na e importancia di periodismo y libertad di expresion den contexto di e actual crisis ambiental global.

Concientisacion di tur aspecto di e crisis global ambiental y su consecuencianan ta esencial pa crea sociedadnan democratico. Trabou periodistico ta indispensabel  pa e fin aki.

Periodistanan ta encontra retonan signifcante den e labor di busca y difundi informacion tocante temanan di actualidad, manera problemanan den cadena di suministro di producto, e migracion climatico, industrianan di extraccion (metal, mineral, hidrocarburo), mineria ilegal, polucion, cazeria of pesca ilegal, traficacion di animal, deforestacion, of cambio climatico.

  1. Garantisa e visibilidad di e temanan aki ta crucial pa promove paz y valornan democratico den henter mundo.

 

  1. Den e contexto di e triple crisis planetario mundial, esta cambio climatico, perdida di biodiversidad y contaminacion atmosferico, campañanan di informacion erroneo y di desinformacion ta pone den duda conocimento y metodonan di investigacion cientifico. Atakenan riba e validez di ciencia ta representa un grave menaza pa e debate publico pluralistico y bon informa. Ta obvio cu informacion erroneo y falso tocante cambio climatico por, den algun caso, mina esfuerzonan internacional pa atende cu e tema aki.

 

Desinformacion y informacion falso tocante temanan ambiental por provoca un falta di apoyo publico y politico pa accion climatico, politica eficaz y proteccion di comunidad vulnerabel afecta pa cambio climatico y tambe di hende y mucha muher, ya cu cambio climatico tin e tendencia di empeora desigualdadnan existente.

Pa logra desaroyo sostenibel, ta necesario pa periodistanan transmiti informacion preciso, oportuno y completo tocante problemanan ambiental y nan consecuencianan, y alabes tocante posibel solucionan.


  1. Pa enfrenta e inundacion di desinformacion den e ecosistema digital informativo, UNESCO a laga traha un manual titula “Journalism, fake news & disinformation: handbook for journalism education and training” na 2018 y na 2023 a lanza “ The Guidelines for the governance of digital platforms” (Guia pa e gobernancia di plataformanan digital). Si implementa den nan totalidad, e normanan y principionan aki lo empodera tur partidonan interesa pa pone den marcha un sistema di gobernancia cu por promove e libertad di expresion y na mesun momento atende cu asuntonan externo negativo.


DIA MUNDIAL DI LIBERTAD DI PRENSA, SITUACION DI ARUBA

Na Aruba e mundo di periodismo tin retonan grandi. Desde 27 maart ultimo ora Camara di Comercio a cuminza cobra pa inforrmacion tocante empresanan, asociacionan y fundacionan registra a bira casi prohibitivo pa haci investigacion periodistico. Hopi problema ambiental ta ser causa dor di proyectonan hotelero y of den sector industrial cu den nan ehecucion por haci daño na naturaleza y medio ambiente. Awor ta bira imposibel casi pa haña sa kende tin tras di proyecto nobo sin gasta un dineral. Consecuentemente prensa lo ser discurasha pa busca mas informacion y bay tras e informacion di tanto Gobierno como e desaroyador cu ademas ta firma non disclosure agreements asina ocultando nan actividadnan planea.

 

Por menciona cu Gobierno den su suministro di informacion ta laga hopi di desea, por ehempel tocante Eagle LNG, Hydrogen Valley Aruba y hasta saneamento di dump na Parkietenbos, plantanan di purificacion na Bubali, Parkietenbos y Zeewijk y e incinerator, y ta tene informacion atras lagando stakeholder den un bashi pa loke ta informacion preciso, oportuno y completo.

 

Y pa loke ta e Conseho Nacional pa Resiliencia Climatico, e Agenda Climatico pa Reino Holandes completo masha poco informacion ta ser divulga y nos por corda con ariba peticion di Ministro Jetten e cumbre First Caribbean Climate and Energy Conference teni na Aruba mei 2023, un grupito selecto so por a participa y ningun stakeholders y e acuerdonan firma no a ser divulga na NINGUN instancia, ni prensa y ni Staten di Aruba. Ademas na final di e cumbre prensa apenas y di chiripa a haña mei ora di rueda di prensa  asina reflehando un atitud di neocolonialismo.

 

Pero tambe ultimamente hasta organisacionan ambiental a cuminza practica un suministro di desinformacion y informacion falso, particularmente Aruba Birdlife Conservation, Anouk Balentina y Aruba Conservation Foundation (antes Fundacion Parke Nacional Aruba) tocante Isla di Oro, destruccion di naturalesa na Seroe Colorado y e impactonan severo pa e di islanan di bubi dor di Secrets Hotel, e asunto bochornoso di planta RWZI na Bubali y incinerator na Parkietenbos cu dor di no opera a pone Aruba acumula mas di 700 mil kiilo di medical waste cu MESTER ser incinera.

 

Prensa na Aruba mester ta vigilante y no bay tras di declaracionan di Gobierno, desaroyadornan sin escrupulo y organisacionan ambiental cu kier tira santo den wowo di pueblo y perhudica nos turismo, comunidad, salud y bienestar general.

 

PA MEDIONAN DI PRENSA EN GENERAL

Pa mas informacion, tuma contacto via telefon na 7478280 of via email [email protected].

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio