Home » Militar Arubiano acusa di a causa accidenta fatal mester a presenta dilanti Hues

Militar Arubiano acusa di a causa accidenta fatal mester a presenta dilanti Hues

Fiscal a exigi 1 aña di prison

by Admin
0 comment 222 views

ORANJESTAD – Awe Corte di Husticia a trata e caso penal cu Ministerio Publico a cuminsa contra e Arubiano militar K.F.V.(22), kende ta wordo sospecha di a ocasiona un accidente fatal caminda e homber M.Ruiz a fayece. Awe mainta tambe e señora viuda di e victima, a hiba palabra den Corte.

ARUBANATIVE por a compronde cu Fiscal a exigi 12 luna di prison pa K.F.V. Abogado ta haya cu mester declara K.F.V. liber pasobra ta polis militar mester a haci investigacion y no Polis cu a haci fayo.

ACUSACION

E acusacionnan cu Fiscal a presenta den Corte contra K.F.V. ta cu riba 14 Juli 2023, el a core auto bou influencia di alcohol y a causa un accidente fatal den Havenstraat. E tabata pusta auto, pasa auto na forma peligroso, manda su auto na man drechi den direccion di e vehiculo cu e tabata pusta. Door di esey e Suzuki a bal dal contra un palo di luz y e defunto M. Ruiz a perde su bida. Abogado mr. Canwood a representa e señora di e defunto cu tambe tabata presente.

ACCIDENTE

Hues a puntra K.F.V. kico a sosode despues cu nan tabata na Sandra’s. K.F.V. a bisa Hues cu e tabata na Sandra’s ta dal drinks cu 3 colega militar y despues nan a bay den auto y kier a bay un club nocturno den vecindario di e hotelnan grandi. Ariba Boulevard na un di e cruzadanan, un auto a pasa K.F.V. y e auto su dilanti. K.F.V. a dicidi di pasa e auto su dilanti y na altura di Wilhemina Park, el a dicidi bay man drechi direccion di Censo. E ora ey el a subi Wilhelminastraat. E auto cu a pasa K.F.V. tambe tabata bayendo e mesun direccion. Hues a bisa cu e auto tabata bayendo e mesun direccion. Segun K.F.V., e no tabata sigui e auto y no tabatin intension di pusta cun’e tampoco. Na altura di Zara, e auto a bay core riba e parti di rails di Tram y a para. K.F.V. a bisa cu el a sigui core pasa e auto. Na altura di Boolchand’s e auto a dal contra K.F.V. Segun K.F.V., el a spanta y na altura di Royal Plaza tabatin un auto blanco. Segun K.F.V. ora e auto a dal contra dje, el a spanta y na altura Royal Plaza, el a bira na man robez y para e auto. Hues a puntra pa kico K.F.V. tabata blo deem-bright hopi e auto. Hues a bisa cu segun testigonan, nan a mira K.F.V. tabata blo deem-bright. K.F.V. a bisa Hues cu su intension tabata pa mustra e auto pa core poco poco. E auto a core bay lag’e. Hues a bisa cu segun e relato di Polis, tur dos auto tabata core duro. Segun K.F.V., ta e auto a bin dal contra dje.

INVESTGACION DI POLIS

Hues a mustra cu 10.50 anochi, Polis a bay banda di Boolchands pa un accidente serio. Polis a constata cu un persona a wordo saca for di auto y benta abao. Cu ambulance el a wordo hiba hospital y el a fayece un dia despues. E homber ta e defunto M. Ruiz kende tabata maneha e Suzuki. K.F.V. tabata maneha un BMW. Polis a constata cu e B.M.V. tabatin un sla na banda drechi dilanti mientras cu e Suzuki tabatin un sla na banda robez dilanti y a bay dal contra un palo di luz keda drey y bay dal contra un baki di mata. Polis a laga K.F.V. supla den e aparato special y a constata cu e tabata bou influencia. El a wordo deteni y rijbewijs a keda confisca y despues duna bek. Hues a bisa cu e caso aki ta militar y e pregunta ta si ta Polis mester a haci investigacion of Marechaussee. El a bisa cu e lo scucha opinion di Fiscal y abogado riba esaki. Hues a sigui bisa cu Polis a busca imagen di tur e cameranan di seguridad for di Boulevard te den Havenstraat pa mira kico exactamente a pasa. Nan a conclui cu e BMW y e Suzuki a sali for di parkinglot di Sandra’s. E Suzuki a pasa e BMW y e auto dilanti e BMW cu velocidad halto. Ora e Suzuki a pasa, e BMW a subi velocidad y pasa e auto, coriendo riba e caminda contrario. Autonan mester a hala un banda. E BMW a sigui tras di Suzuki cu velocidad halto. E BMW tabata bright – deem varios biaha. Nan a sigui core tras di otro. Tin tres testigo para banda di Kock Optica den Wilhelminastraat, kendenan a mira e autonan nan core hopi duro. Polis a constata cu e BMW a duna 13 biaha señal di luz na e Suzuki. Na altura di Zara e Suzuki a bay core riba e rail di Tram. E BMW na dado momento a kita na man drechi banda di e Suzuki y despues sigui core man robez. Banda di Boolchand’s, e Suzuki a subi velocidad pa pasa e BMW, net banda di Lucky Store e accidente a sosode. No tabatin camera ey banda pa mira con e accidente a sosode. E Suzuki a dal contra BMW y sigui riba 2 tire den banda y bay dal contra un palo di luz y keda draai y e BMW a sigui core bay. E BMW tabata core zig zag y Polis ta sospecha cu ta e BMW lo a dal contra e Suzuki. Polis a haci investigacion, con duro e autonan tabata core a base di loke por a mira riba e cameranan. Riba Boulevard nan tabata core riba di 100 km pero despues a baha velocidad. Polis ta haya cu aunke cu no a surpasa velocidad den e cayanan chikito, nan tabata core duro. Polis ta conclui cu ta e BMW a bay na man drechi, dal contra e Suzuki y door di e impacto e auto a bay dal contra palo di luz y keda drei. Esaki a causa cu e victima M.Ruiz a wordo saca y fractura su craneo. Door di esey el a fayece.

TESTIGONAN

Hues a mustra cu e testigonan banda di Kock Optica a bisa cu ta parce cu e BMW tabata persigui e Suzuki y nan tabata core duro. E BMW tabata bright-deam e Suzuki. Tin testigo ta bisa cu ta parce cu nan lo tabatin problema cu otro. Nan tabata core hopi irresponsabel. E testigonan tabata sa cu algo lo bay pasa.

E chofer di e auto blanco cu tabata core dilanti den Havenstraat, e homber D., a bisa cu el a mira e BMW tabata bright-deem. El a kere cu e BMW tabatin pura pa bay hospital of algo asina. El a subi velocidad y el a mira cu e BMW a dal contra e Suzuki cu tabata core riba e caminda di Tram.

Segun un ocupante di BMW., W., a bisa cu su colega K.F.V. ta core semper un poco duro. El a bisa cu diripiente un auto a dal contra e banda cu e ta sinta, banda drechi. El a kere cu ta un accidente chikito. K.F.V. a spanta y kier a sigui core bay. W. a bis’e pa ban wak. El a bisa cu e no sa kico K.F.V. tabata haci pasobra e tabata riba su cellular. E otro colega T. a bay wak y a bisa nan cu e accidente tabata serio. W. ta kere cu ta e auto kier a pasa nan pero no a calcula bon y dal contra nan. K.F.V. a declara na Polis cu e tabata bebe hopi e dia ey for di merdia. El a sali for di Sandra’s cu intension di bay Gusto. Door cu Boulevad tabata druk, el a bay coy e caminda paden. Segun K.F.V., ta e Suzuki a dal contra dje.

Riba pregunta di abogado mr. J.Tromp, K.F.V. a bisa cu el a bisa Polis cu e no ta di acuerdo cu e resultado di blaas pasobra e no tabata sinti su mes burachi. Fiscal a remarca cu hopi chofer ta kere cu e no ta burachi pero en realidad no ta asina. E dia ey segun K.F.V., el a bebe 12 bebida, siendo cu segun ley 2 bebida ta suficiente. Ta asina cu e BMW ta confisca ainda.

DEMANDA DI DAÑO

Abogado mr. Canwood a bisa Hues cu e pareha a sufri daño algo mas di 11 mil florin, cu ta encera gastonan di entiero y mester huur auto pa regla cosnan. Te ainda no tin auto. Pa loke ta daño inmaterial, e abogado a demanda 25 mil florin. El a bisa Hues cu ainda e pareha y e 2 yiunan ta bou tratamento di psycologo. Awor ta e señora viuda S.T. mester encarga cu famia. E famia di e pareha mester yuda cu transporte.

SEÑORA VIUDA A PAPIA

E señora viuda S. Ruiz Tromp a bisa Hues cu su bida a cambia ora cu Ruiz a fayece. Nan tin dos yiu. El a bisa cudia 14 Juli 2023, Ruiz a pidi’e pa nan sali anochi. Banda di 7’or, Ruiz a bis’e cu e tin un asunto di bay regla y despues nan ta bay sali. Banda di 9’or, S. tabata message Ruiz unda el a keda pa nan bay sali. Ruiz a bisa cu e tabata na caminda. Ora a pasa y S. riba facebook a mira cu tabatin un accidente grave. El a spanta y a pidi famia pa nan bay. Ora el a yega na e lugar, el a mira hopi sanger riba caminda y ya Ruiz a wordo hiba hospital. El a bay hospital y mira su casa riba cama tur na sanger. Na dado momento dokternan a bisa cu e ta clinicamente morto. E señora viuda S. a bisa cu e tabata papia cu Ruiz pa no lag’e. Su siguiente dia, Ruiz a fayece. Na entiero tabata hopi tristo. El a bisa cu el a dicidi cu e no lo casa nunca mas. S. a puntra, ki motibo hende por tin pa core asina duro, cu causa morto di su casa. E muchanan ta yora y e grandi ta puntra pakico esaki mester pasa cu nan. S. a bisa cu e ta kere den Dios pa pordona K.F.V.

FISCAL

Fiscal a bisa Hues cu den un fraccion di 1 seconde, a caba cu bida di un hende y e famia a keda perhudica. Ruiz a fayece door di e accidente. Na opinion di Fiscal, no por bisa cu intencionalmente K.F.V. a causa morto di Ruiz. E ta haya cu K.F.V. tin culpa di a causa morto di Ruiz.

Fiscal a bisa cu tin pregunta cu si den e caso aki Marechaussee mester a atende e caso of Polis. Fiscal ta haya cu ora ta trata di trafico tin algun diferencia di ley pero nos mester atene nos na leynan di Aruba. El a mustra cu tin caso militar trata den Corte na Hulanda caminda a usa leynan. K.F.V. a wordo deteni ora a constata cu e cantidad di alcohol den su rosea ta mucho mas cu loke ley ta permiti. Fiscal a bisa cu K.F.V. no a bisa cu e ta un militar. Ta su siguiente dia el a bisa esey y e ora ey a notifica Marechaussee cu tambe a haci investigacion.

Fiscal a mustra cu for di imagennan di cameranan di seguridad, por a mira con K.F.V. cu su BMW y e Suzuki a sali for di Sandra’s te momento cu e accidente a sosode den Havenstraat. Tin testigonan a declaracion cu e autonan tabata core hopi duro tras di otro manera cu problema lo tabatin cu otro. Tin cu a mira cu ta e BMW a dal contra e Suzuki. Esnan den e BMW no a papia kico realmente a pasa. Ta parce cu nan no tin sentimento cu un hende a perde su bida. K.F.V. ta bisa cu a coy e caminda paden pasobra riba Boulevard tabata druk. Fiscal a remarca cu riba e cameranan no por mira cu Boulevard tabata druk.

Fiscal a bisa cu e investigacion ta mustra den direccion cu ta e BMW a kita na man drechi y dal contra e parti robez di e Suzuki. Ta conclui cu ta K.F.V. a ocasiona e accidente y tabata bou influencia di alcohol. Fiscal ta haya cu K.F.V. ta culpable pa morto di Ruiz. E ta haya cu K.F.V. tabata core pa loco. Na opinion di Fiscal, ora ta papia di pusta, ta papia di core pa loco. Testigonan a mira con nan tabata core. K.F.V. tabata bright-deem constantemente cu ta mustra cu lo tabata pusta. Door di e impacto, Ruiz a wordo saca for di e auto.

CASTIGO

Fiscal a mustra cu a base di ley tin un diferencia grandi entre culpa y intencional. E ta conciente cu pa hopi esaki no ta comprendibel, pero pa culpa e castigo ta menos. Pa cu e castigo, Fiscal a bisa cu e ta tene cuenta cu ta promer biaha cu K.F.V. ta presenta dilanti Hues. El a exigi 12 luna di prison y 3 aña sin rijbewijs. Pa loke ta e demanda di daño, Fiscal a pidi pa aproba e gastonan di entiero. Pa loke ta e otro demandanan, e ta laga esaki na decision di Hues. Pa loke ta e daño inmaterial, Fiscal ta conciente cu esaki ta hopi duro pa famia y ta laga na decision di Hues. El a exigi pa e auto BMW keda confisca.

ABOGADO

Abogado mr. J.Tromp a bisa Hues cu su cliente ta un militar y como tal ta cay bou leynan Hulandes. E ta haya cu leynan Hulandes ta otro y no por usa e resultado di test di Polis como prueba y mester declara K.F.V. liber. Den e caso aki ta Marechaussee mester a haci investigacionnan y no Polis. E hecho cu Polis no a yama Marechaussee no por cay pa cuenta di K.F.V. El a bisa Polis cu e ta un militar pero Polis a sigui cu e investigacion. E abogado a mustra cu Polis no a mustra K.F.V. su derecho pa bolbe haci test pasobra e no ta di acuerdo cu e resultado di test. E ta haya cu mester declara K.F.V. liber di tabata bou influencia di alcohol. Haya cu no por prueba legalmente cu K.F.V. tabata core burachi. No por bisa cu ta door di influencia di alcohol, K.F.V. a ocasiona e accidente. Investigacion di Polis mes ta mustra cu K.F.V., cu excepcion di pasamento di un auto riba Boulevard, no tabata core cu velocidad halto. No ta haya cu por papia cu tabatin pustamento di auto. No por bisa cu seguridad kico exactamente a sosode. Por tin otro posibilidadnan cu no por exclui. E abogado a mustra diferente scenario cu por a ocasiona e accidente. El a mustra cu e chofer di e Suzuki lo por a perde control ora a core riba e rail di Tram cu a pone e auto slip. E ta haya cu tin mucho duda kico realmente a pasa. E abogado ta haya cu mester declara K.F.V. liber. Pa loke ta demanda di daño, e abogado ta haya cu hopi di e demandanan no tin relacion directo cu e fayecido. E ta haya cu lo ta mihor pa haci un caso civil y declara e demanda no admisibel. El a pidi pa debolbe e BMW.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio