Dia Mundial di Creatividad y Innovacion ta ser conmemora April 21 y ta enfoca ariba e papel cu creatividad y innovacion ta hunga den nos economia local y global y alaves den e procesonan pa soluciona problemanan cu nos ta encontra pa yega na un desaroyo sostenibel.
No tin un interpretacion universal di e concepto di creatividad. E concepto por ser comprendi di cubri e spectrum di expresion artistico te cu soluciona problema (problem-solving) den e contexto di desaroyo economico, social y desaroyo sostenibel.
Pesey Nacionan Uni a designa April 21 como Dia Mundial di Creatividad y Innovacion pa eleva e concientisacion pa e papel cu creatividad y innovacion ta hunga den tur aspecto di desaroyo humano.
TEMA PA 2024: STEP OUT AND INNOVATE, LANTA Y INNOVA
E tema pa 2024 ta “Step out and innovate” esta “Lanta y Innova”.
Pa implementa innovacion mester den promer instancia di individual, studiante, empresario y organisacion tanto den sector priva, sociedad civil, mundo academico, enseñanza y gobierno pa crea iniciativa, proyecto y infrastructura pa por innova.
Na Aruba nos ta conta cu iniciativa den Gobierno manera IDEA y ExProDesk, Fundashon Futura y e facultad SISSTEM na Universidad di Aruba, pero den sociedad civil tambe tin multiple organisacion dedica na innovacion.
Dia di Tera 2022 a crea Science, Technology and Innovation Platform Aruba consistiendo di cuater fundacion: Natural Care Aruba Foundation, Rainbow Warriors Core Foundation, International Teleport Aruba Foundation y Institute for Industrial Development Aruba Foundation.
Den un Memorandum of Collaboration nan a delinea cu e plataforma cu tin un “open and flat network structure” di un comunidad innovativo (innovation community) ta utilisa e quadruple y quintuple helix models di Union Europeo pa desaroyo economico y social local, regional y internacional acopla y sincronisa na e Obhetivonan di Desaroyo Sostenibel (SDGs) di Nacionan Uni.
E areanan di colaboracion ta ciencia fundamental, investigacion y desaroyo di ingenieria y ciencia aplica, ciencia abierto y inclusivo, incluyendo citizen science y entorno di innovacion (startup accelerators, incubators y parke cientifico y tecnologico)
Ta enfoca riba e siguiente SDGs: Bon Salud y Bienestar, Educacion di Calidad, Awa Limpi y Sanitacion, Energia Berde y Pagabel, Trabou Husto y Crecemento Economico, Industria, Innovacion y Infrastructura, Ciudad y Comunidad Sostenibel, Consumo y Produccion Responsabel, Accion Climatico, Bida bou Awa, Bida riba Tera y Partnerships pa SDGs.
Cinco area tematico transversal a ser identifica pa ciencia, tecnologia y innovacion:
- Salud, trabou, bienestar y envehecimento
- Maneho di recurso natural y renovabel (awa, energia, desperdicio, agricultura y biodiversidad)
- Ciencianan biologico y medico
- Economia di conocimento, infrastructuran digital, inteligencia artificial, e Internet of Things
- Ciencia y tecnologia espacial, incluyendo robotica, sensor remoto y tecnologianan autonomo.
Nacionan Uni a crea United Nations Innovation Network (UNIN), un comunidad collaborativo informal di innovadornan di cual na Aruba tambe tin organisacion afilia.
Aña pasa a lanta un fundacion nobo na Aruba specificamente dirigi riba innovacion, siendo Caribbean Applied Engineering and Science Research Foundation, cu enfoke riba innovacion den sector priva y comunidad.
UNIN ta saca diferente rapport tocante e tema di innovacion den e procesonan pa yega na implementa e obhetivinan di desaroyo sostenibel (SDGs).
E mas recien ta UN Innovation Update 2024, cu ta mustra e diferente enfoke innovativo cu tin den tur area di Nacionan Uni.
E areanan ta (1) Inteligencia artificial y machine learning, (2) Ciencia di comportamiento, (3) Blockchain, (4) Cultura di Innovacion, (5) Innovacion di data, (6) Transformacion Digital, (7) Drone y imagen satelital, (8) Inteligencia artificial generativo, (9) Innovacion en general, (10) Escalamento di innovacion, (11) Finanza innovador, (12) Innovacion basa riba telefon mobil, (13) Prevision Strategico, (14) Innovacion den proceso di negoshi y (15) Tecnologia di frontera (avanguardia).
Un rapport saca dor di UNICEF na 2019 titula “Scaling innovation for every child. Strategies and models learned from scaling innovation in 90 countries” ta un documento cu ta captura strategia, modelo y e factornan critico pa exito cu a surgi for di mas di 1600 dia di trabou di ampliacion di innovacion pa muchanan den 90 pais haci dor di UNICEF Global Innovation Center. Dicho rapport ta di importancia pa introduci (escalamento di) innovacion den enseñanza.
Na Aruba falta un consensus riba e papel cu innovacion por y tin cu hunga tanto den sector existente economico, como den diversificacion y e recursonan humano y financiero, instrumentonan legal, fiscal, educacional y comunitario rekiri pa creatividad y innovacion impulsa y genera bienestar economico pa un y tur den cuadro di implementa e Obhetivonan di Desaroyo Sostenibel (SDGs).