Oranjestad. – Riba Diasabra ultimo, 24 di Augustus, 2019, Kiwanis Club of Palm Beach e tene un evento exitoso pa promove e uzo di childseat den trafico na Aruba. Un ‘childseat’ ta un asiento di auto pa baby of mucha chiquito cu ta proteha e mucha den caso di accident den trafico.
E actividad a wordo teni Diasabra atardi caminda cu pa 3.30pm a cuminsa reparti sticker di concientisacion di uzo di childseat riba L.G. Smith Boulevard na altura di oficina di Aruba Tourism Authority (ATA). Pa 5.00pm tabata tin un actividad na Neptali Henriquez Park caminda Kiwanis Palm Beach a haci entrega di 25 childseats na famianan di menos recurso den nos communidad.
Na e ocasion aki Sr. Michel Janssen, President di Kiwanis Club of Palm Beach, a expresa: “Ta importante pa tin concientisacion pa uso di childseat den trafico na bienestar y seguridad di tur muchanan cu ta nos futuro generacion. Ademas di concientisacion general, pa hopi aña nos ta haci donacion di childseat na famianan di menos recurso. E gastonan di e proyecto aki a wordo cubri cu fondonan cu nos club di servico ta recauda durante e aña. Asina nos ta contribui na seguridad den trafico pa nos muchanan”.
Presente tabata tambe vocero suplente di Cuerpo Policial, Sra. Liliana Rasmijn, kende a enfatisa e aspecto di seguridad den trafico y e leynan vigente riba e tereno aki:
“Conforme nos ley, mucha di edad bao di 12 aña mester sinta patras den auto den un forma sigur. Esaki ta cu un faha di seguridad pa muchanan mas grandi y esnan chiquito mester ta den un stoel apropia y bon instala, e asina yama childseat.
Duranto control policial hopi biaha nos ta topa cu e fenomeno cu tin muchanan para mei mei den e auto, dus los entre e asientonan, of mucha sinta dilanti den scochi. E consequencia di esaki ta cu si dal un brake repentino of den situacion di un accident, e mucha lo por lesiona su mes contra e windshield. Esaki ta algo sumamente peligroso y ta mira esaki hopi durante accidentnan. E mensahe di Cuerpo Policial ta pa semper bo yui ta sinta den un childseat pa preveni algo lamentabel sosode. Ta mihor preveni cu lamenta! Nos ta gradici y apoya e proyecto di Kiwanis Club of Palm Beach pa loque ta e entrega y concientisacion pa e uso di childseat.”
Finalmente Sra. Monique Giel, representante di Wit Gele Kruis, a expresa: “Nos ta orguyoso di ta un partner den e proyeco aki pa hopi aña. Nos aporte ta encera cu nos ta escohe e famianan cu ta bin na remarke pa haya un childseat na e ocasion aki door cu nos sa cu nan por haci bon uso di dje. Nos ta felicita Kiwanis Club of Palm Beach cu un otro edicion exitoso di e proyecto aki y nos ta contento cu nos por a forma parti un biaha mas di e proyecto importante aki“.
Kiwanis Club of Palm Beach Aruba ta forma parti di Kiwanis International, un organisacion mundial di voluntario dedica na cambia mundo, cuminsando na un comunidad y un mucha. Nos ta un organisacion den crecimento, dedica na yuda muchanan di mundo henter hisando nan calidad di bida.
Pa mas information di Kiwanis Club of Palm Beach bishita nos webpage na www.kiwanispalmbeach.com of nos Facebook Page na https://www.facebook.com/kiwanispalmbeach.