Minister Plenipotencario mr. Joselin Croes ta dedica y comprometi pa crea mas oportunidad pa nos studiantenan por studia na Merca y Canada. Deseo di Minister Plenipotencario Croes ta pa banda di University of South Carolina, Coastal University y Wayne State College logra haya mas Universidad cu ta dispuesto pa ofrece nos studiantenan instate-tuition fee. Berdad Aruba a wordo poni riba e lista di Latin American Scholarship Elegibility pa tur Florida State Universities, pero e instate tuition no ta bin sin mas. E hoben mester aplica pe y e mester cumpli cu varios exigencia pa por bin na remarca. Minister Plenipotencario Croes lo bolbe bishita algun Universidad na Florida pa wak si nos por haya por lo menos algun cupo na dos of tres Universidad cu ta mara na e instate tuition fee. Tambe Minister Plenipotencario Croes ta purbando di haya un par di Universidad na Boston, Atlanta y na Washington mes. Otro aña e lo ta bishitando e Universidadnan na Canada cu Aruba tin MoU cu nan pa asina renoba e varios contratonan aki.
Pero banda di crea oportunidad pa studiantenan, Minister Plenipotencario Croes ta fungiendo como e persona di contacto entre varios institucion na Aruba y esunan na Merca. Su tarea ta pa haci e prome bishita, crea oportunidad y di eynan pone e institucionnan concerni den contacto cu otro pa asina nan mes sigui negocia e posibel colaboracionnan.
Universidad di Aruba (UA):
Por ehempel un team di Universidad di Aruba (UA) pronto lo ta biahando pa Boston pa cera un MoU cu Northeastern University pa UA forma parti di e Global Resilience Institute cu sigur ta pas den e maneho di UA specialmente awor cu nan ta bay introduci SISSTEM. Tambe nan lo bishita University of Massachussets (UMASS) y Notheastern University pa yega na un acuerdo pa capacity building y exchange program pa nan staff y docentenan pero tambe exchange programs pa nan stuidiantenan.
Instituto Pedagogico Arubano (IPA):
Cu Instituto Pedagogico Arubano (IPA) a combersa riba e idea di Minister di Enseñansa pa un fusering entre IPA y UA y pa converti IPA den un Academic Learning Center cual lo significa cu den futuro IPA lo ta e institucion cu lo mester percura pa tur tipo di oportunidad educacional pa hoben y adulto. Alabes e mester bira un institucion cu lo mester haci investigacion den ramo di educacion. Un reunion hopi ameno na unda nan a pidi Minister pa yuda ISA cu capacity building di nan team, inclusion di STEAM den nan curicolo, un curicolo pa yuda nan maneha cu e problemanan social na Aruba, introduccion di ‘blended learning’ cu ta algo hopi comun na mayoria scol na Merca y pa crea oportunidad pa nan studiantenan por loop stage na Washington, Atlanta of Baltimore. Tambe a discuti e partnership cu Wayne State College pa un Master Program nobo cu pronto nan lo introduci.
International School of Aruba (ISA):
Cu International School of Aruba (ISA) a discuti un proposicion cu Minister Plenipotencario Croes a presenta na Minister di Enseñansa pa cera un tipo di colaboracion cu ISA pa prepara nos studiantenan cu kier bay studia na Merca pa yuda nan pasa nan SAT, pero tambe pa presenta un proposicion pa tin algun di e top studiantenan di HAVO y VWO di menos recurso cu ta desea di bay studia na Merca pa por haya e oportunidad pa haci nan ultimo 2 of 3 añanan di studio na ISA pa asina nan por logra un GPA halto pa por bin na remarca pa un scholarship. Esaki por yuda tambe e atletanan cu ta bay Merca cu un scholarschip. ISA lo traha un proposicion pa Minister di Enseñansa pa cu e idea aki.
Minister Plenipotencario Mr. Joselin Croes ta hopi satisfecho pa mira educacion na Aruba bay den un direccion di progreso brindando nos hobennan mas oportunidad aki na Aruba como tambe na Merca.