Minister Plenipotencario na Washington mr. Joselin Croes a bay bek su trabou na Merca hopi satisfecho cu e varios reunionnan cu Minister di Enseñansa y e instituto educativo na Aruba durante su bishita di trabou cortico na Aruba. Entre otro Minister Plenipotencario na Washington Croes a bishita:
Colegio Arubano:
Cu un mentor di Colegio Arubano a papia over di e struikelblokken pa nos hobennan por bay studia na Merca, cual primordialmente ta e costonan halto di educacion. Minister a splica cu e trend nobo na Merca ta cu mayoria studiante Mericano ta scoge pa bay un Community College of bay studia afo pa nan prome 2 añanan y nan ultimo aña di Bachelor y nan dos aña di Master nan ta haci’e na un bon scol na Merca. Wayne State College cu Aruba a caba di cera un MoU cu ne, ta brinda nos hobennan e oportunidad ey ya cu nan tuition fee ta USD 6000. Pero por ehempel un Roxburry Community College na Boston, un Miami Dade College y un University of District of Columbia tambe ta rond di USD 9000 pa aña na tuition fee. A papia tambe di e problematica di preparacion di nos studiantenan pa e SAT test plus e transcript di nan cifranan na un cifra di GPA.
Directie en Inspectie Onderwijs:
Minister Plenipotencario Croes tambe a reuni cu e team di Inspectie Onderwijs y Directie Onderwijs. Un reunion na unda a comparti e maneho educativo principalmente e deseonan pa ‘internacionalisering’ di e educacion, capacitacion di nan team, ayudonan tecnico nesesario pa modernisa e Sistema educacional, bin na un solucion pa e transcript di e diploma y cifranan di nos studiantenan pa nan por logra haya scholarships na Merca, negociamento di e contratonan cu Canada. A palabra cu lo traha un raport pa Minister di tur nan deseonan na unda nan por uza colaboracion for di institutonan na Merca.
Stichting Schouwburg Aruba en Arubaanse Muziekschool
Un otro bishita importante ta cu Cas di Cultura y Scol di Musica Rufo Wever. E reunion cu nan tawata importante pasobra Berkelee College na Boston kier bin Aruba pa scout nos hobennan pa posibel scholarship programs y nan kier inclui Aruba den nan Latin American Programs cu nan tin. Cas di Cultura a presenta nan plannan di renobacion y e nesesidad di financiamento tambe e nesesidad den ayudo technico pa cu e proyecto grandi aki. Stichting Arubaanse Muziekschool a splica cu e studio di musica ta hopi caro na Merca y a pidi pa yuda haya colaboracion pa nan studiantenan por bay studia na Merca. Tambe nan lo desea di haya capacitacion pa nan maestronan di musica.
Minister di Educacion
E reunion pa cu educacion di mas importante tawata cu Minister di Enseñansa na unda a discuti e contratonan cu varios Universidad di Canada cu mester wordo renoba, introduccion di tweetalig onderwijs, bishita di Minster na september na NYU Steinhardt pa purba yega na proyectonan concreta pa yuda IPA bira un Academic Learning Center. Tambe a papia cu Minister e partnership cu Minister Plenipotencario Croes ta trahando riba dje entre Biblioteca Nacional di Aruba y Public Library of Boston pa capacitacion di e ekipo, innovacion di e biblioteca y colaboracion pa cu digitalisacion di mas buki. Por ultimo a papia over di e Mou cu Aruba tin pendiente cu University of District of Columbia pa cu un Urban Food Hub Center cual nan kier haci cu EPI y Santa Rosa.
Consul General Allen Greenberg
Por ultimo Minister Plenipotencario Croes a invita e Consul General Allen Greenberg cu tambe tawata na Aruba pa dos dia di bishita pa un dinner na unda a discuti varios topico importante pa Aruba, manera Venezuela, Economia, CPB etc. pero kedando riba e topico di enseñansa, un super bon noticia pa enseñansa ta e hecho cu e kier institui un comision entre Aruba y Merca pa por comparti mas informacion y oportunidad pa intercambio educativo entre Aruba y Merca.
Tawata 4 dia di trabou hopi extenso pa Minister Plenipotencario Croes riba e tereno di enseñansa. Nos hoben studiantenan ta central y Minister Plenipotencario mr. Joselin Croes ta trahando pa logra oportunidadnan grandi pa nan.