ORANJESTAD – Den e relato aki nos ta presenta un compilacion di e trabounan cu a ser haci den Ministerio di Finansa, Asuntonan Economico y Cultura durante e prome seis lunanan di aña 2019. Un aña den cual Gabinete Wever-Croes a demostra seriedad den pasonan cu mester a
wordo tuma y a haci cambionan necesario for di un punta di bista realistico manera delinea
den e acuerdo di Memorandum Financiero Economico (FEM) cu Gobierno a firma cu
Hulanda aña pasa.
Nos responsabilidad ta concentra pa nos Pais Aruba por cumpli cu e metanan cu nos mes
a fiha den FEM pa por yega na un finansa publico manehabel. Pasonan a ser tuma pa
stabilisa e situacion financiero di nos Pais y tambe nos a bin cu incentiva pa acelera e
proceso economico di nos Pais.
Gobierno a fiha un rumbo pa cana den FEM y tambe a publica su Maneho Economico pa
un Aruba fuerte y resiliente. Cualnan ta dunando resultado ya cu riba tereno financiero
internacional nos a ricibi evaluacionnan alentador y positivo.
Nos ta maneha e Pais cu seriedad y hopi dedicacion pa nos trabou y na un manera
financieramente responsabel. Nos ta convenci cu poco poco pero sigur cu pasonan
concreto nos por recupera e credibilidad financiero di nos Pais pa asina nos tin un Pais
Aruba cu hopi oportunidad pa nos y nos futuro generacion.
Awe nos ta presenta e trabaonan realiza riba e tereno di finanzas publico. Siguientemente lo sigui riba e tereno di economia y despues e tereno di cultura.