ORANJESTAD, Recientemente, den cuadro di observacion di e dia internacional contra Trafico di Hende, na Brasil, e Organizacion Internacional pa Migracion (OIM) a organiza varios sesion di cinema dirigi na migrantenan y refugiadonan venezolano na Boa Vista, frontera cu Venezuela.
OIM, pa medio di e YouTube Channel a haya sa di e documentario produci na Aruba, ‘Promesa Falso’, cual a wordo produci door di e Switch Foundation.
Debi na e mensahe impactante cu e documental ta contene, OIM a solicita Switch Foundation e permiso pa exhibi esaki durante e sesionnan durante e siman di concientizacion aki.
Durante cada sesion tabata presente un promedio di 30 persona y despues di e exhibicion a tuma lugar charlanan relaciona cu e topico.
Un aspecto importante ta cu Switch Foundation ta ofrece tur organizacion pa tuma contacto cu nan si nan ta desea di ‘screen it’ pa yuda cu e causa di proteha esnan mas vulnerable di explotacion laboral y sexual.
“Pa mi como fundadora, productora y guionista di Promesa Falso a keda sorprendi y a sinti honra cu un organizacion importante manera Nacionnan Uni y relevante asina lo a kere den nos trabou. Mas importante ta cu for di Aruba nos por yuda proteha e comunidadnan mas vulnerable na mundo actualmente door di crisisnan social y politico”, Paula Nahr a expresa.
Tambe, a agrega, ‘nan a pidi mi conseho pa sugeri y elegi e videonan pa nan mustra durante nan actividad tocante prevencion di explotacion laboral na e refugiadonan y migrantenan venezolano na Boa Vista, Brasil, frontera cu Venezuela cu ta supremamente vulnerabel awor aki”.
Nahr a sigui bisa cu “mi a haci un buskeda intensivo y mi a manda nan un lista di videonan cortico anima cu den un forma facil principalmente ta mustra con e promesanan falso ta wordo duna na esnan vulnerabel y den necesidad pa trabao”.
E ta haya asina valioso e hecho cu un organizacion di UN a pidi su conseho pa elegi e videonan apropia como un persona conocedor di e tema. Esey ta un muestra cu nan ta kere den su criterio y den su experticio relaciona cu e topico di ‘Human Trafficking’
‘Promesa Falso’ ta un documentario cu a wordo lanza aña pasa cu e obhetivo principal di capta e atencion y educa e hoben y mayornan. Tambe ta mustra cual ta e señalnan pa tene na cuenta den un posibel caso di abuso of explotacion y asina yuda preveni pa mas mucha muher of hende muhe bira victima di abuso of explotacion sexual.
Paula Nahr kier encurasha tur organizacion pa haci nan rednan digital e prioridad pa informa y educa pasobra a traves di e medionan digital tur hende por tin acceso y lo por yega facilmente na un informacion valioso cu por guia of escapa un hende na tempo.
“Awendia nos ta biba den un era digital y tur contenido informativo y educativo mester wordo publica den nan rednan social, YouTube Channel y tur plataforma digital y medionan di comunicacion posibel ya cu cada plataforma tin un audiencia diferente”.
Finalmente el a bisa: “Mi ta invita tur mayor, organizacion y scolnan pa tuma contacto cu nos via: [email protected] y [email protected] pa nan por haya e video y yuda proyecta e mensahe di Promesa Falso na mas hoben y mayor cu ta posibel en especial esnan cu a bay of ta bayendo studia afor.
Wak y yuda nos crece door di subscribi y comparti Promesa Falso na nos YouTube channel: Switch Foundation Aruba”.
Promesa Falso ta un produccion di Switch Foundation den partnership cu Kiwanis Young Professionals, Counter Trafficking Task Force, Departamento di Cultura y Nahr Media.