Prome Ministro di Aruba, Sra Evelyne Wever-Croes y su destinguido esposo, Na coleganan minister, Honorable Pfesidente di Parlamento Sr Ady Thysen, Honorable miembronan di parlamentarionan, demas invitadonan y especialmente sr Nelson Oduber, ex Prome Minister di Pais Aruba y su distinguida esposa, yuinan y demas familiares. Un bon tardi y Bon Bini na un momento special y memorable.
Cu un sentimiento di convivencia y reconocimento mi ta dirigi algun palabra na boso como minister encarga cu infrastructura. Awe ta un dia memorable, unda no solamente nos ta para, riba e retonde aki, na vispera di apertura di un ader importante di nos infrastructura di camindanan, pero tambe ta prepara pa aki rato inaugura un otro ader principal di nos infrastructura di camindanan, cual vision a inicia den decadanan 80, cu e meta di por logra un desaroyo economico prospero pa nos Pais, cual meta a keda logra, dunando esaki e nomber di “Avenida Nelson Orlando Oduber”.
Un momento historico unda ta para keto na un trayectoria encamina desde e siglo pasa, unda como diputado di pais Aruba sr Nelson Oduber a sa di crea y ehecuta un plan maestro jama ‘Sasaki’, enfocando riba nos turismo y e importancia di tin un plan infrastructural solido pa por sostene e crecemento di e industria aki y contribui na progreso di nos pais. Sr Oduber a dedica 36 aña di su bida na Pais Aruba den posicionan publico cu a sa di contribui na crecemento continuo di un Isla chikito den un Pais grandi cu yen di oportunidadnan pa su hendenan. Asina su persona a ocupa e puesto di Prome Ministro di nos Pais durante 14 aña den nos Status Aparte. Grandesa ta ora logronan personal ta significa logronan pa su pais.
Kizas algun no lo comprende y lo enfoka riba diferencianan politico. Pero ami ta para akinan awe paso e caminda por ta largo pero basta e ta sigur. Mi ta kere cu diferencianan mester wordo supera pa interes general di nos pueblo. Laga nos no lubida cu ta sirbido di pueblo nos tur ta.
Señor Oduber a contribui na e transformacion di Aruba di un isla pa un pais autonomo y den un pais madura, nos mester por duna merito na es cu merece. No obstante creencia of color. Laga nos reconoce y gradici cada persona cu a contribui na nos desaroyo. Ta nada mas cu e empeño , vision y curashi asumi door di lidernan y ciudadano durante nos historia como pueblo chikito y orguyoso cu a transforma nos den e nacion respeta rond mundo cu NOS ta jama Aruba. (E caminda por ta largo pero basta e ta uno sigur.)
Dios sa cu nos tin retonan nos dilanti y algun incertidumbre… pero sigur nada cu nos no por surpasa. Wak nos historia bo lo sa, nos pueblo ta bendiciona. Hunto nos ta logra sigura e futuro di nos pais. Esaki cu madures y respet. E caminda por ta largo, pero nos lo yega sigur.
Den nomber di gobierno mi ta felicita sr Oduber y henter su famia, su amistadnan y tur esnan cu a siguie durante hopi aña y Aruba engeneral, pa e reconocimiento di honor aki y cu inauguracion di “Avenida Nelson Orlando Oduber”
Pabien ! Y cu nos Bon Señor keda Bendishona nos Baranca Stima Aruba