Miles y miles di pakete di blokie cocaina a wordo benta den lama, pero mayoria a wordo saca for di fondo di lama.
Panama/Colombia: Marina Colombiano a logra intercepta un boto cu miles y miles di bloki cocaina abordo. E accion aki tabata un cooperacion entre marina Colombiano y marina Panameño.
Diadomingo durante dia un boto sospechoso tabata nabegando den awa teritorial Panameño y tabata bayendo direccion di America Central. Marina y Forsa Aereo a dicidi di actua cu helicopter y boto pa asina sigui e boto sospechoso aki. Na momento cu esnan abordo a nota cu nan ta wordo sigui, mesora nan a cuminsa benta e paketenan di cocaina den lama, mas o menos 90 pakete a wordo benta den lama.
Nan a purba huy pero despues di un persecusion cortico nan a keda deteni, ta trata di 5 persona di nacionalidad Colombiano. Marina Panameño a logra saca mayoria di e paketenan for di fondo di lama. En total un cantidad di 4575 kilo di cocaina a wordo haya y a keda confisca.
E cantidad di droga aki cu a wordo confisca ta un di e mas grandinan pa autoridad Colombiano. Na November 2017 nan a logra confisca e cantidad mas grandi, e tempo ey a logra confisca 12 mil kilo di cocaina, cu un balor di casi 350 miyon dollar.