Dos siman pasa nos a papia tocante siguridad di nos muchanan durante temporada di vakantie y awe nos kier brinda boso cu un poco mas informacion y tips.
Vakantie ta un temporada dushi pa relaha y haci actividadnan leuk. Ora nos ta pensa ariba proteccion di nos muchanan durante vakantie, mayoria biaha nos ta pensa ariba proteccion solar, come saludabel y hidratacion. Poco biaha nos ta pensa ariba proteccion contra abuso (sexual). Abo tabata cu nos muchanan por bira mas vulnerabel durante temporada di vakantie pa abuso y negligencia?
Scol ta cera
Pa masomenos 6 siman scol lo ta cera. E mucha lo no wak su maestra/o pa un tempo largo, cual ta un persona importante, na momento di señala comportacion cu no ta usual pa e mucha. Si un persona ta sospecha cu un mucha ta wordo abusa of neglisha, e mester yama Bureau Sostenemi na 588-1010 pa pidi conseho tocante e pasonan cu mester wordo tuma pa yuda e mucha. Corda cu e siguridad di nos muchanan ta un responsabilidad di cada adulto, nos no por bira cara.
Muchanan ta keda diferente caminda
Temporada di vakantie por trece pression pa mayornan of adultonan cu tin mucha den nan cuido. Como cu scol ta cera, esaki por trece stress pa mayornan, pa busca cuido (oppas) pa nan yiunan. E ta varia pa cada mucha cerca ken nan lo keda durante vakantie. Tin mucha lo keda cu wela/o, tanta of omo. Muchanan lo haci actividadnan afo, entre otro campamento of lo bay hunga na cas di amigo of amiga. E mucha lo pasa tempo cu otro mucha y adulto cu e no conoce. Durante vakantie, supervision y/of e falta di esaki ta keda un factor di riesgo pa abuso (sexual).
Kico nos mester haci?
Papia cu nos muchanan y hobennan na un manera habri y honesto. Adulto, especialmente mayornan of personanan cu ta cuida muchanan, ta fungi como un role model y e prome fuente di informacion pa un mucha. P’esey ta importante pa duna nos muchanan informacion corecto.
Papia tocante nan curpa y siña nan e nomber corecto di nan parti intimo: nunu (vagina) y pilinchi (penis)
Siña nos muchanan cu tin limite. Niun hende mag di mishi na nan parti intimo! Nan nunu of pilinchi, incluyendo anus y pecho ta di nan so. Ful nan curpa ta di nan so!
Bisa e mucha ken e por yama na momento cu e ta sinti insigur. Esaki sigur ta un tip valioso pa mayornan cu ta traha y no por yega den corto tempo cerca e mucha. Puntra e mucha ken ta su adultonan di confiansa. Palabra cu e mucha cu den caso di emergencia e lo yama of bay cerca un adulto di confiansa, sea un tanta, omo, welo/a, amigo/a of un bisiña cu e ta confia. E persona di confiansa aki mester ta den vecindario di e mucha, sea den e mesun bario of caya. Corda haci palabracionnan simpel cu e mucha, nada complica pa demotiva e mucha pa busca ayudo durante un emergencia.
Si bo yiu ta bay bishita un camp durante vakantie: puntra kico ta e reglanan ora un mucha mester bay baño, cambia paña, drumi, pauze, sacamento di potret etc. Tin ora kier comparti kico e muchanan ta haci durante e camp, pero semper mester tene e privacidad di e mucha na cuenta. Si ta bay saca potret di un mucha cu badpak of badbroek, corda cu e mucha no tin e edad, ni capacidad cognitivo pa duna consentimento pa saca potretnan asina. Respet ta cuminsa di chikito caba, y saca potret di un mucha semi sunu ta un falta di respet!
E ta bon pa puntra tambe, si e organisadonan di e camp ta exigi un papel di buena conducta (formulario di V.O.G.) for di e lidernan di camp. Puntra tocante supervision: cuanto lider pa cada cantidad di mucha y con e muchanan lo wordo supervisa durante actividadnan di camp.
Si e mucha mester keda cu famia of amistad: stipula reglanan di siguridad prome. Aplica un safeword, esaki lo ta e mucha su manera pa vocifera cu e mester di bo proteccion. Palabra un ora cu bo lo yam’e pa sigura cu tur cos ta “okay” cu e mucha. E mucha so mag di sa ki ora bo lo yama, e persona cu ta keda encarga cu e mucha no mester sa esaki. E safeword por wordo bon uza durante un fiesta di mucha of actividad familiar. Uzando e palabra di siguridad e mucha lo por vocifera cu algo no ta sinti bon, cu e ta sinti incomodo of insigur. E ta keda na e adulto di confiansa cu ken e mucha a palabra e safeword aki pa brinda proteccion y apoyo emocional.
Siña nos muchanan pa no keda nan so, den un espacio cera, cu un otro mucha (di edad mas grandi of cu ta fisicamente mas grandi) of otro adulto. Esaki ta baha e risico di abuso sexual, como cu un abusador lo no haci actonan sexual cu un menor den presencia di otro hende.
Supervision ta esencial. Laga un mucha sin supervision ta un forma di negligencia. Nos no por garantisa e siguridad di un mucha si e keda su so, sin supervision di un adulto di confiansa. Muchanan, especialmente si nan ta bou di 12 aña, mester keda semper cu un adulto di confiansa.
Esaki nan ta algun tips chikito cu por haci un diferencia grandi na momento cu ta trata di siguridad di nos muchanan.