Oranjestad, Aruba – Despues di mira e gran acogida cu Kiwanis Young Professionals of Aruba (KYPA) a ricibi aña pasa na momento cu a anuncia e continuacion di e proyecto yama ‘Placa Chikito’, KYPA a keda convenci cu mester sigui cu esaki. Placa Chikito ta un proyecto na unda ta pone atencion y siña nos muchanan e importancia di finanzas personal. KYPA a introduci un buki, na unda cu por medio di un storia, ‘Axel y su Pork’i Spaar’ ta conta nos muchanan con pa spaar, y pa sea consciente na momento di uza nan placa y tambe duna bek.
Pa por yega mas serca di nos muchanan Kiwanis Young Professionals a organisa atardinan di storia rond di nos isla cu a resulta den un exito total. E aña aki un biaha mas lo tin e atardinan di storia na unda tur mucha por registra y participa. Un total di cuater diasabra atardi consecutivo den diferente districto rond Aruba lo tin e actividad aki. Tur atardi di storia lo ta di 6or pa 8or y lo ta pa muchanan entre 5-12 aña. E storia di ‘Axel y su Pork’i Spaar’ a wordo skirbi door di Edseline Figaroa y ilustra door di Leidy Ledesma. E atardi nan e storia lo wordo conta y dramatisa danki na señora Martica Lugay y tambe señor Richard Dabian. Gradicimento tambe na Alexis Tromp cu a percura pa e grabacion di audio pa e dramatisacion. E unico diasabra atardi di storia cu tin cupo ainda ta 17 di Augustus na Biblioteca San Nicolas, por registra libremente na [email protected]
Por ultimo Kiwanis Young Professionals kier gradici Elite Productions & Entertainment, Paradera Party Center, EZ Party Solutions, Biblioteca Nacional Oranjestad y San Nicolas, Aruba Bank y CMB pa haci e proyecto e aña aki un biaha mas posibel y ta conta cu sosten di nos muchanan pa por sigui traha pa nos comunidad.