Helicopter di Coast Guard Mericano, a baha na Aruba cu dos Piscado perdi, cu 18 dia pasa a sali for di St. Lucia pa bay pisca.
Oranjestad: Diaranson den oranan laat di atardi, e helicopter grandi di US Coast Guard a baha na Aruba cu dos persona cu nan a rescata for di riba lama grandi, tabata trata di dos piscado cu tabata den un boto ta drief na un distancia di 120 miya leu for di Aruba.
E dos piscadonan a sali 18 dia pasa for di St Lucia cu un boto di un motor pa bay pisca. Mientras nan tabata piscando algo lo a bay robes y nan a keda ta drief riba lama sin por a yega tera. Diaranson den oranan di atardi, e patruya di Coast Guard a bin topa cu nan, despues di a logra capta señal di nan boto. E helicopter a sali mesora pa bay rescata e dos piscadonan y a opta pa aterisa cu e Helicopter na Aruba, cual tabata e aeropuerto cu tabata mas cerca.
Na yegada di e Helicopter, dos unidad di ambulance y demas autoridad tabata presente na Airport pa mesora atende cu cu e piscadonan y despues ambos piscador a wordo transporta pa hospital.
Esaki sigur tabata un final felis, pa famia di piscadonan cu despues di a biba 18 dia di angustia y tristeza pensando cu nan a perde nan sernan keri, nan ta ricibi e grato noticia cu nan sernan keri ta na bida y ta riba tera firme.