Diaranson 28 november pa 7’or di anochi na MFA-Santa Cruz
ORANJESTAD – Dia 14 di november tabata Dia Mundial di Diabetes y henter luna di november ta dedica na concientisacion y informacion na comunidad riba e tema aki. E aña aki e enfasis ta riba famia pasobra Diabetes por afecta tur hende, di un mucha te un adulto mayor pa e motibo aki e apoyo di famia ta di suma importancia.
Diabetes ta un epidemia global cu ta afecta un cantidad di hende homber, muher y muchanan diariamente na henter mundo.
Diabetes por causa malesanan grave cu ta afecta curason y adernan, bista, riñon y djentenan. Den mayoria pais cu entradanan halto, Diabetes ta un di e causanan principal di malesa cardiovascular, ceguera, problema cu riñon y amputacion di pia. Ta ser calcula cu un 629 miyon adulto lo ta afecta pa aña 2045.
Club di Lions como organisacion di servicio comunitario, nos ta comprometi na yuda resolve e problemanan mas grave di mundo. Diabetes ta un di servicionan global di e 5 areanan, cualnan ta un desafio considerabel pa nos humanidad y nos ta kere cu ta nos deber pa enfrenta esaki.
Como club di servicio comunitario nos ta mira y sinti e efectonan di e malesa Diabetes den nos comunidad y nos no ta keda man crusa. Nos obhetivo ta pa yuda reduci e prevalencia di Diabetes y mehora e calidad di bida di e personanan cu ta diagnostica cu Diabetes y como organisacion nos ta promove un estilo di bida saludabel. Nos kier crea conciencia den nos comunidad riba e malesa di diabetes, pa medio di prevencion y control, concentrando riba un alimentacion sano y actividadnan fisico. Diabetes ta concerni tur famia. Famianan mester ricibi educacion y informacion pa asina hiba un bida saludabel. Un diagnosis na tempo por evita complicacionnan di Diabetes. Tur persona di famia por core riesgo di haya Diabetes y pesey door di duna informacion corecto con pa reconoce e simptomanan por yuda na detecta esaki na tempo.
Lamentablemente no tin cura ainda pa Diabetes solamente tin tratamento cu por yuda controla esaki. Mundialmente costonan envolvi cu tratamento di Diabetes por ta hopi halto pa e pashent y su famia. Den hopi pais e costo pa injeccionan di insulina y su control diario por yega na casi mitar di un famia su entrada mensual of e acceso na medicina pa diabetes pa hopi famia ta casi imposibel.
Menos di un di cada cuater famia tin acceso na informacion corecto con pa diagnostica Diabetes. Conta cu ayudo di bo famia pa informacion y tratamento ta hopi importante, e ta haci cu e impacto emocional ta menos pa e pashent y den casonan cu por diagnostica Diabetes na tempo por yuda reduci e gastonan pa famia tambe considerablemente.
Diabetes ta un di 5 causanan di servicio global di Lions Club International banda di Visualidad, Hamber, Cancer Infantil y Medio Ambiente.
Cada trayecto ta cuminsa cu un promer paso. Un acto di servicio pa trece e speransa na unda mas tin mester di dje, duna un palabra di animo, un acto di generosidad. Aruba One Happy Island Lions Club kier duna di su parti y como muestra di esaki ta organisando un anochi informativo cu e tema “Haya sa mas di diabetes?”. Esaki lo tuma lugar diaranson 28 di november 2018 na MFA Santa Cruz cuminsando pa 7’or di anochi te cu 9’or y mey di anochi. Pa e anochi aki Aruba One Happy Island Lions Club tin como invitado Dr. Dellanire Maduro, medico general, un dokter naci na Aruba cu a bay studia na Costa Rica na 2009 y a gradua como medico na aña 2016. Despues di a bolbe Aruba, Dellanire a bin ta dedica e.o. como praktijkondersteuner huisartsen specialmente pa personan cu enfermedadnan cronico manera diabetes, presion halto etc. Dr. Dellanira Maduro ta duna diferente charla riba e tema di salud.
Cu e anochi informativo aki Aruba OHIL Club kier mustra esnan diagnostica cu Diabetes, nan famia y comunidad en general cu ta posibel biba bon y maneha Diabetes satisfactoriamente, como tambe con pa preveni esaki. Lo tin oportunidad pa haci pregunta. Entrada lo ta gratis, ta pidi un y tur pa yega na tempo mirando cu e cuponan ta limita. Pa mas informacion tocante e charla por yama na 562-9129.